މިއަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ޖުމްހޫރީ ޕާޓީ (ޖޭޕީ) ގެ ފަރާތުން ވާދަކުރާނޭ ރިޔާސީ ކެންޑިޑޭޓަކު ހޮވުމަށް ބާއްވާ ރިޔާސީ ޕްރައިމަރީގައި ވާދަކުރެއްވުމަށް އެޕާޓީގެ ލީޑަރު ޤާސިމް އިބްރާހީމް ނިންމަވައި އެކަމަށް ކުރިމަތިލައްވައިފިއެވެ.
އެކަމަށް ކުރިމަތި ލައްވައި އެމަނިކުފާނު ޖޭޕީގެ ސެކްރެޓަރީޖެނެރަލް ޢަލީ އާރިފަށް މިއަދު ފޮނުއްވާފައިވާ ސިޓީގައި ވިދާޅުވެފައިވަނީ ރިޔާސީ އިންޕްރައިމަރީގައި ވާދަކުރުމަށް ހުޅުވާލައިފައިވާ މުއްދަތުގެ އެންމެ ފަހުވަގުތާ ހަމައަށް ވެސް އެޕާޓީން އެހެން ބޭފުޅަކު ކުރިމަތި ލައްވައިފައި ނުވާކަމަށެވެ. އެހެނަސް ޖޭޕީއަކީ އެ މަޤާމަށް ޝަރުތު ހަމަވާ އެތައް ބޭފުޅުން ތިއްބެވި ޕާޓީއެއް ކަމަށް ވެސް ޤާސިމް ވިދާޅުވެފައިވެއެވެ.
ޖޭޕީގެ ރިޔާސީ ޕްރައިމަރީއަށް ވާދަކުރުމުގެ ފުރުސަތު އެޕާޓީން ހުޅުވައިލީ މާރިޗު 16 ވަނަދުވަހުއެވެ. އެ މުއްދަތުހަމަވީ މިއަދު 12:00 ގައެވެ.
