ޖުމްހޫރީ ޕާޓީ (ޖޭޕީ) ގެ ރިޔާސީ ޕްރައިމަރީއަށް އެޕާޓީގެ ލީޑަރ ޤާސިމް އިބްރާހީމް ކުރިމަތި ލެއްވުމުން އެމްޑީޕީގެ ރައީސް، ރައީސް މުޙައްމަދު ނަޝީދު މަރުޙަބާ ވިދާޅުވެއްޖެއެވެ.
ޖޭޕީގެ ރިޔާސީ ޕްރައިމަރީގައި ވާދަކުރެއްވުމަށް އެދިވަޑައިގެން އެޕާޓީގެ ސެކްރެޓަރީޖެނެރަލް ޢަލީ ޢާރިފަށް ޤާސިމް ފޮނުވި ސިޓީއާއެކު ރައީސް ނަޝީދު ޤާސިމަށް މަރުޙަބާ ވިދާޅުވެފައިވަނީ މަޖިލިސް މެމްބަރުން ތިއްބަވާ ވަޓްސްއެޕްގްރޫޕުގައެވެ. "އޮނަރަބްލް ޤާސިމް އިބްރާހީމަށް ވަރަށްބޮޑަށް މަރުޙަބާ،" ރައީސް ނަޝީދު ވިދާޅުވެފައިވެއެވެ.
ރައީސް ނަޝީދު ޤާސިމަށް މަރުޙަބާ ވިދާޅުވުމުން އެމްޑީޕީގެ ދާންދޫދާއިރާގެ މަޖިލިސް މެމްބަރު ޔައުޤޫބު ޢަބްދުﷲ ވަނީ ރައީސް ނަޝީދަށް ވަރަށްބޮޑަށް ފާޑުވިދާޅުވެފައެވެ. އޭނާ ވިދާޅުވެފައިވަނީ ރައީސް ނަޝީދަކީ ޑިމޮކްރަސީގެ ބައްޕަ ކަމަށް ދަޢުވާ ކުރެއްވި ބޭފުޅެއް ކަމަށެވެ. އެހެންނަމަވެސް އެކަން މިހާރުވަނީ ދޮންބައްޕައަށް ބަދަލުވެފައި ކަމަށް އޭނާ ވިދާޅުވެފައިވެއެވެ.
"ފުރަތަމަ ފަހަރަށް ބޭއްވުނު ވާދަވެރި ޕްރައިމަރީއަކުން ބަލިވީމާ ބޮޑާހާކަމުން ތިޔަދަނީ. ތިމަންނައަކީ ޑިމޮކްރަސީ ބައްޕަކިޔާ ދެއްކިހާ ވާހަކަ މިހާރު އެބަދަލުވަނީ ދޮންބައްޕައަށް،" ޔައުޤޫބު ވިދާޅުވެފައިވެއެވެ.
ޖޭޕީއާއި ރައީސް ނަޝީދާ ދެމެދު ވަނީ ރިޔާސީ އިންތިޚާބުގައި ކޯލިޝަން ހެދުމާބެހޭގޮތުން މަޝްވަރާތައް ފަށައިފައެވެ. އޭގެ އިތުރުން އެހެންޕާތީތާކާ ވެސް ޖޭޕީން ގެންދަވަނީ މަޝްވަރާ ކުރައްވަމުންނެވެ. އެހެންނަމަވެސް އެއްވެސް ކަމެއް އަދި ފައިނަލް ވެފައި ނުވާކަމަށް މަޢުލޫމާތު ލިބިފައިވެއެވެ.
