ސްޓެލްކޯ ގެ ކަރަންޓުބިލުގައި ކުނީގެ ބިލު ހިމަނައި މިފެށޭ ޖޫންމަހުގެ ކަރަންޓުބިލުގައި ކުނީގެ ބިލް ހިމެނިގެންދާއިރު ލިފްޓު މީޓަރު ނުވަތަ މެއިންޓަނަންސް މީޓަރު ފަދަ މީޓަރު ތަކަށް ދާ ބިލުގައި ވެމްކޯގެ ބިލު ނުހިމެނޭނެކަމަށް ސްޓެލްކޯގެ މެނޭޖިން ޑިރެކްޓަރ އަހުމަދު ޝަރީފު ވިދާޅުވެއްޖެއެވެ.
މިއަދު ހަވީރު ސްޓެލްކޯގެ ހެޑްއޮފީހުގައި ބޭއްވުނު ވެމްކޯގެ ބިލު ސްޓެލްކޯގެ ބިލުގައި ހިމެނުމުގެ އެެއްބަސްވުމުގައި ސޮއި ކުރުމުގެ ރަސްމިއްޔާތުގައި ދެއްކެވި ވާހަކަފުޅުގައި ޝަރީފް ހާމަކޮށްފައި ވަނީ ސްޓެލްކޯގެ ބިލަށް ވެމްކޯގެ ބިލު ހިމަނާނީ ކުނި އުފައްދާ މީޓަރތަކުންކަމަށެވެ. އެގޮތުން ލިފްޓުމީޓަރުތަކާއި މެއިންޓަނަންސް މީޓަރތައް ފަދަ މީޓަރު ތަކުގެ ބިލުގައި ވެމްކޯގެ ބިލެއް ނުހިމެނޭނެކަމަށެވެ. ހަމައެހެންމެ ގޭބިސީތަކުގެ މައުލޫމާތު އަޕްޑޭޓްކުރަން އިލްތިމާސްކުރަމުން ވިދާޅުވީ އާއްމު ގޭބިސީ ކަރަންޓް މީޓަރުތަކުގެ ތެރޭގައި ލިފްޓް ނުވަތަ މެއިންޓަނަންސް މީޓަރެއް ހުންނަ ނަމަ އެފަރާތްތަކުން "ޔޫޓިލިޓީ މީޓަރު އެކްސްކުލޫޝަން ފޯމް" ފުރިހަމަކޮށް، އެކޯޕަރޭޝަނަށް ހުށަހެޅުމަށެވެ.
މިގޮތަށް ކުނީގެ ބިލު ސްޓެލްކޯގެ ބިލުގައި ހިމެނުމުގެ މަގުސަދަކީ ބިލުތަކަށް ފަސޭހަކަމާއެކު ފައިސާ ދެއްކޭނެ އިންތިޒާމު ކަސްޓަމުންނަށް ފަހިކޮށް ދިނުން ކަމަށް ވެސް ޝަރީފް ވިދާޅުވިއެވެ. އަދި މިގޮތަށް ބިލު ފޮނުވާއިރު މައްސަލައެއް ދިމާވާނަމަ އެކަމެއް ހައްލުކޮށް ދިނުމަށް ދެކުންފުނިންވެސް މަސައްކަތް ކުރާނެކަމަށް ޝަރީފް ވިދާޅުވިއެވެ. އެއްވެސް ކަހަލަ މައްސަލައެއް އޮތްކަމަށް ވަންޏާ ދެކުންފުނިން ކޮންމެވެސް އެއް ކުންފުންޏަކަށް ކޮންމެވެސް ކަހަލަ ވަސީލަތެއް މެދުވެރިކޮށް އެވާހަކަ އެންގުމަށް ޝަރީފް އިލްތިމާސްކުރެއްވިއެވެ.
އަދިވެސް އިތުރަށް ޝަރީފް ވިދާޅުވީ މީހުން ނޫޅޭ ގެއެއްގެ މީޓަރެއްގެ ބިލުގައި ވެމްކޯ ބިލެއް ނުހިމަނާނެ ކަމަށެވެ. އެގޮތުން 34 ޔުނިޓް ނޫނީ އެއަށްވުރެ މަދުން އަރާ އެއްވެސް މީޓަރަކަަށް ވެމްކޯ ބިލެއް ނުކުރާނެ ކަމަށެވެ. އަދި ކުނި ނުއުފައްދާ މީޓަރަކަށް ވެމްކޯގެ ބިލު ކުރެވޭނަމަ އެކަން އެންގުމުން ވަގުތުން ޑީއެކްޓިވޭޓް ކުރެވޭނެ ކަމަށެވެ.
މިރަސްމިއްޔާތުގައި ވޭސްޓް މެނޭޖްމަންޓް ކޯޕަރޭޝަން، ވެމްކޯގެ މެނޭޖިން ޑިރެކްޓަރ ޔޫސުފް ސިރާޖް ވިދާޅުވީ، ޖޫން މަހުން ފެށިގެން ބިލް ކުރާނީ މަހަކަށް 150ރ ގެ ރޭޓުން ކަމަށެވެ. އެގޮތުން އަހަރަކަށް ޖެހޭ މިންވަރު 1800ރ، 365 ދުވަހަށް ބެހުމަށްފަހު ދުވާލަކަށް ޖެހޭ 4.9315 ގެ ރޭޓުން ސްޓެލްކޯއިން ތައްޔާރު ކުރާ ކަރަންޓް ބިލުގައިވާ މުއްދަތަށް ބިލްކުރާނެ ކަމަށް ވެމްކޯއިން ބުނެއެވެ.
ސިރާޖު ވިދާޅުވީ ގެއެއްގައި އެއްމީޓަރަށް ވުރެ ގިނަ މީޓަރު ހުންނަ ގެއަކަށް ވާނަމަ ސްޓެލްކޯ ނުވަތަ ވެމްކޯއަށް އެކަން އެންގުމަށެވެ.
"މިއީ ކޮންމެހެން ދައްކަންޖެހޭ އަދަދު ބޮޑުވެގެން ނޫނޭ، އެދެއްކުމުގަ އަދަދު ކުޑަވެގެން ނުވަތަ ބައެއް ފަހަރު ދެއްކުމުގެ ދަތިތަކެއް އަންނަނީ. ނޫނިއްޔާ އެނުދެއްކި ނަމަވެސް ޚިދުމަތް ލިބޭ ގޮތަށް މިއޮންނަނީ. ނޫނިއްޔާ ކުނި ނުނަގައިފިއްޔާ އެހެން ދިމާލަކަށް ގެންދިޔަ ޔަސް، އެބަނަގައޭ. އެކަހަލަ ނިޒާމެއް މިއޮތީ. އަޅުގަނޑުމެން މިމަސައްކަތް ކުރަނީ ކަސްޓަމަރުންނަށް ބިލް ދެއްކޭނެ ފަސޭހަ ގޮތެއް ހޯދުމަށް. ދެން ނުދައްކާ ހުރި ފައިސާ މިހާރުވެސް ވެމްކޯގައި ފެންނަން ހުންނާނެ. އެކަމާއިމެދު ކަންކުރާނެ ގޮތެއް ވެމްކޯއިން ނިންމާނެ." ސިރާޖް ވިދާޅުވިއެވެ.
ސިރާޖު ވިދާޅުވީ މީގެ ކުރިންވެސް ކުނިނަގަމުން އައި ގޮތަށް ގޭގެ ތިރީގައި ކުނި ބަހައްޓާތަކުގައި ކުނި ބެހެއްޓުމަށެވެ. އަދި އެހެނިހެން އެޕާޓްމަންޓުތަކުގެ ކުނިނަގާނީ އެބައިތަކަށް ގޮސް ކުނި ނަގާނެ ކަމަށެވެ. ހަމަ އެއާއެކު މަގުތަކަށް ކުނިނެރެ ނުބެހެއްޓުމަށް ވެސް އިލްތިމާސްކޮށްފައިވެއެވެ.
ސްޓްލެކޯގެ ޖޫން މަހުގެ ބިލުގައި ވެމްކޯގެ ބިލުވެސް ހިމެނިފައިވާނެ ކަމަށާއި އެއްވެސް ކަމެއް އޮޅުން ފިލުވަން ބޭނުން ފަރާތްތަކުން ދެ ކުންފުނިން ތެރެއިން ކޮންމެވެސް އެއް ކުންފުންޏަކަަށް އެންގުމަށެވެ.
