އެންވަޔަރުމެންޓް މިނިސްޓްރީގެ ސްޓޭޓް މިނިސްޓަރުގެ މަގާމުން އަހުމަދު މުޖުތަބާ ވަކިކޮށްފިއެވެ.

ރައީސް އޮފީހުގެ މިނިސްޓަރު އިބްރާހީމް ވަހީދު (އިބުރޭ) ސޮއިކުރައްވައި މުޖުތަބާއަށް ފޮނުއްވާފައިވާ ސިޓީއެއްގައި ވިދާޅުވީ، އެންވަޔަރުމެންޓް މިނިސްޓްރީގެ ސްޓޭޓް މިނިސްޓަރުގެ މަގާމުން މުޖުތަބާ ވަކިކުރެއްވުމަށް ރައީސް އިބްރާހީމް މުހައްމަދު ސޯލިހު ނިންމަވާފައިވާ ކަމަށެވެ.

އެމްޑީޕީގެ ރައީސް، ކުރީގެ ރައީސް މުހައްމަދު ނަޝީދުގެ "ފިކުރެއްގެ ދިރުމުން" އުފައްދަން މަސައްކަތް ކުރާ "ދަ ޑިމޮކްރެޓްސް" ޕާޓީއަށް މުޖުތަބާ ވަނީ ސޮއިކުރައްވައިފައެވެ.

މުޖުތަބާ މަގާމުން ވަކިކުރެއްވުމާ "މުޖުތަބާއަކީ އެމްޑީޕީން ކުރިއަށް ގެންދިޔަ އިސްލާހީ ހަރަކާތްތަކުގައި އެންމެ ވަރުގަދަ އެއް ތަނބު ކަމަށް" ނަޝީދު ވަނީ ރޭ ކުރެއްވި ޓުވީޓެއްގައި ވިދާޅުވެފައެވެ.

"ރައީސް ސޯލިހު މިއަދު ސަރުކާރުން ވަކިކުރެއްވި މުޖުތަބާ އަކީ މުޅި އިސްލާހީ ހަރަކާތުގެ އެންމެ ވަރުގަދަ އެއް ތަނބު. ރައީސް ސޯލިހު ލަދުފުޅު ނުގަނޭބާ އޭ ހިތަށް އަރާ،" ނަޝީދު ވިދާޅުވިއެވެ.

ޓޫރިޒަމް މިނިސްޓްރީގެ ސީނިއާ އެގްޒެކެޓިވްގެ މަގާމުން އެމްޑީޕީގެ އެކްޓިވިސްޓެއް ކަމަށްވާ އަލީ ހާޝިމް (ސްމިތު) ވެސް އިއްޔެ ވަނީ ވަކިކޮށްފައެވެ. ސަރުކާރުގެ ސިޔާސީ މަގާމުތަކުގައި ތިއްބަވައިގެން "ދަ ޑިމޮކްރެޓްސް" އަށް ސޮއިކުރެއްވި މީހުން ސަރުކާރުން ގެންދަނީ މަގާމުން ވަކިކުރަމުންނެވެ.

އިތުރު ލިޔުންތައް އެމްޑީޕީ ދަ ޑިމޮކްރޭޓްސް