ނިޔާމަ ރިސޯޓުން ހަތް މީހަކު ކޮވިޑަށް ޕޮޒިޓިވްވެ، އެ ރަށަށް އަރާ ފޭބުން ވަގުތީ ގޮތުން މަނާކޮށްފި އެވެ.
ހެލްތު އިމަޖެންސީ އޮޕަރޭޝަން ސެންޓަރުގައި ރޭ ބޭއްވި ނޫސްވެރިންގެ ބައްދަލުވުމުގައި އެސެންޓަރުގެ ތަރުޖަމާނު ޑރ.ނަޒްލާ ރަފީޤް ވިދާޅުވީ ނިޔާމަ ރިސޯޓުން އިއްޔެ ހަތް މީހުން ކޯވިޑް-19އަށް ޕޮޒިޓިވްވަފައިވާކަމަށެވެ.
"ނިޔާމަ ރިސޯޓުން ޕޮޒިޓިވްވި މީހުން ޓެސްޓްކުރީ ބަލީގެ ޢަލާމާތްތަކެއް ހުރުމުން. އިތުރު 2 ސްޓާފުން ކޮންޓެކްޓުންގެ ގޮތުގައި ޓެސްޓްކުރެވުނު. މިހާތަނަށް އެރިސޯޓުން ޖުމްލަ 17 ސާމްޕަލެއްވަނީ ޓެސްޓްކުރެވިފައި. އޭގެ ތެރެއިން 7 މީހަކު ޕޮޒިޓިވެފައި މިވަނީ" ނަޒްލާ ވިދާޅުވިއެވެ.
ޑރ.ނަޒްލާ ވިދާޅުވީ ނިޔާމަ ރިސޯޓް މިވަގުތު މޮނިޓަރިންގައި އޮތުމާއެކު އެރަށަށް "ސްޕްލިޓް ސްޓޭ" ހެދުމާއި ސްޓާފުން އެކި ތަންތަނަށް ދިއުން މިވަގުތު ހުއްޓުވާފައިވާކަމަށެވެ. މީގެ އިތުރުން އެރަށުގައި ރެންޑަމް ސާމްޕަލް ނެގުމުގެ މަސައްކަތް ދ.އަތޮޅު ހޮސްޕިޓަލާއި ނިޔާމަ ރިސޯޓްގެ ކަމާގުޅޭ ޓީމާއެކު ކުރަމުންދާކަންވެސް ޑރ. ނަޒްލާ ފާހަގަކުރެއްވިއެވެ.
