އަމިއްލަ ރައްޔިތުންގެ ލޭއޮހޮރުވާލަން ބޭނުން ނުވާކަމަށް ބުނެ ރަޝިޔާގެ ކުލީ ސައިންގެ ލަޝްކަރު "ވެގްނާ ގްރޫޕް" އިން ވެރިރަށް މޮސްކޯ ހިފުމުގެ ވިސްނުން ދޫކޮށްލައިފިއެވެ.
ރަޝިޔާ އަސްކަރިއްޔާއާ ދެކޮޅަށް ހަނގުރާމަ އިއުލާންކޮށް މޮސްކޯ ހިފާނެކަމަށް އިއްޔެ އިއުލާން ކުރި ވެގްނާ ގްރޫޕުގެ ލީޑަރު އަދި ރަޝިޔާ ރައީސް ވްލަޑަމިއަރ ޕުޓިންގެ ކުރީގެ ގާތް ރަހްމަތްތެރިޔާ ޕްރިގޯޒިން ވިސްނުން ބަދަލު ކުރުވުމުގައި އެންމެ އިސްދައުރެއް އަދާކުރެއްވީ ބެލާރުސްގެ ރައީސް އެލެގްޒެންޑަ ލުކަޝެންކޯއެވެ. ރަޝިޔާއިން ޔޫކްރައިނާ ދެކޮޅަށް ފަށާފައިވާ ހަނގުރާމައިގައި ލުކަޝެންކޯ ގެންދަވަނީ ޕުޓިންއަށް ވަރަށް ބޮޑަށް އެއްބާރުލުން ދެއްވަމުންކަން ފާހަގަ ކޮށްލެވެއެވެ.
ޕްރިގޯޒިން އާއި އޭނާގެ އަރިސް ބޭފުޅުން ރަޝިޔާގެ އެންމެ ދެކުނުގައި އޮންނަ ރުސްތޯވްއަށް އިއްޔެ އަތްގަދަ ކުރީ ހަނގުރާމަ ކުރުމަކާ ނުލައެވެ. ރޮސްތޯވްއަކީ ޔޫކްރައިނާ ދެކޮޅަށް ރަޝިޔާއިން ކުރަމުން އަންނަ ހަނގުރާމައިގައި މުހިއްމު އަސްކަރީ މަރުކަޒެއް ޤާއިމް ކޮށްފައިވާ ސިޓީއެކެވެ.
ރަޝިޔާގެ ޚަބަރުތައް ބުނާ ގޮތުން ޕްރިގޯޒިން އޭނާއަށް ތަބައަވި ސިފައިން ގޮވައިގެން މިހާރު ރޮސްތޯވްއިން ފައިބައި، ބެލާރުސް ރައީސްގެ ހިމާޔަތުގައި އެގައުމަށް އެތެރެވުމަށް ދަނީ މަސައްކަތް ކުރަމުންނެވެ.
ރަޝިޔާގެ ރިޔާސީ ގަނޑުވަރު، ކްރެމްލިން ބުނީ ވިސްނުން ބަދަލުކޮށް ހަތިޔާރު ބަހައްޓަން ނިންމުމުން ޕްރިގޯޒިން އާއި އޭނާގެ ސިފައިންނަށް ގައުމަށް ޤައްދާރުވިކަމުގެ ދައުވާ ނުކުރާނެ ކަމަށެވެ. އަދި ޕްރިގޯޒިންގެ އޯޑަރަށް ބޯލެނބުމަށް ދެކޮޅު ހެދި ސިފައިންނަށް ރަޝިޔާގެ އަސްކަރިއްޔާއިން ކޮންޓްރެކްޓް ހުށަހަޅާނެ ކަމަށެވެ.
ކްރެމްލިން އިން ބުނީ ރައީސްގެ ޕުޓިންގެ އެންމެ ބޮޑު އަމާޒަކީ ރަޝިޔާގެ އެތެރޭގައި ދާޚިލީ ހަނގުރާމައެއް ފެށުނަ ނުދިނުން ކަމަށާއި މިކަމަށްޓަކައި ދައްކަން ޖެހުނު ކޮންމެ އަގެއް ރަޝިޔާ ސަރުކާރުން ދައްކަން އޮތް ކަމަށެވެ. ވެގްނާ ގްރޫޕާއެކު އެއްބަސްވުމަކަށް އާދެވުނުއިރު އެގްރޫޕުގެ ކުލީ ސިފައިން ތިބީ މޮސްކޯއާ ގާތްގަނޑަކަށް 200 ކިލޯ މީޓަރު ދުރުގައި ކަމަށް މީޑިއާ ރިޕޯޓުތައް ބުނެއެވެ.
ވެގްނާ ކުލީ ސިފައިން މޮސްކޯއަށް އެތެރެވެދާނެ ކަމަށް ބަލައި ރަޝިޔާ އަސްކަރިއްޔާއިން މަޝްހޫރު ރެޑް ސްކޮޔަރ ބަންދުކޮށް އިއްޔެ ބަރުހަތިޔާރާއެކު މަގުތަކަށްވެސް ނިކުތެވެ.
