ވަރލްޑް ޓްރެވެލް އެވޯޑްސްއިން ރޭ ހޮވި ދުނިޔޭގެ އެންމެ މަގުބޫލް ޓުއަރިޒަމް މަންޒިލްގެ (ވަރލްޑް ލީޑިންގ ޓުއަރިޒަމް ޓެސްޓިނޭޝަން) އެވޯޑް ރާއްޖެއިން ފަސްވަނަ ފަހަރަށް ދިފާއު ކޮށްފިއެވެ.
މަޝްހޫރު ފުޓްބޯޅަ ތަރި ކްރިސްޓިއާނޯ ރޮނާލްޑޯގެ އުފަން ރަށް ޕޯޗުގަލްގެ މެޑެއިރާގައި ބޭއްވި މި ހަފްލާގައި ރާއްޖެއިން އެވޯޑާ ހަވާލުވީ ފަތުރުވެރިކަމާ ބެހޭ ވަޒީރު އިބްރާހިމް ފައިސަލްއެވެ.
ޖެހިޖެހިގެން ފަސްވަނަ ފަހަރަށް ދުނިޔޭގެ އެންމެ މަގުބޫލް ޓުއަރިޒަމް މަންޒިލްގެ އެވޯޑް ރާއްޖެއަށް ލިބުމާއި ގުޅިގެން ވަޒީރު ފައިސަލް ވިދާޅުވީ މިއީ ފަތުރުވެރިކަމުގެ ދާއިރާގައި މަސައްކަތް ކުރައްވާ ހުރިހާ ފަރާތްތަކެއްގެ ބުރަ މަސައްކަތުގެ ނަތީޖާ ކަމަށެވެ. އަދި ފަތުރުވެރިކަމުގެ ދާއިރާގައި މަސައްކަތް ކުރައްވާ ހުރިހާ ފަރާތްތަކަށް ވަޒީރު ޝުކުރު އަދާކުރެއްވިއެވެ.
ދުނިޔޭގެ އެންމެ މަގުބޫލް މަންޒިލްގެ އިތުރުން، ރާއްޖެއަށް މިފަހަރު ވަނީ އިންޑިޔަން އޯޝަން ލީޑިންގ ޑެސްޓިނޭޝަން، އިންޑިޔަން އޯޝަން ލީޑިންގ ހަނީމޫން ޑެސްޓިނޭޝަން، އިންޑިޔަން އޯޝަން ލީޑިންގ ގްރީން ޑެސްޓިނޭޝަން އަދި އިންޑިޔަން އޯޝަން ލީޑިން ޑައިވް ޑެސްޓިނޭޝަންގެ އެވޯޑްވެސް ލިބިފައެވެ.
ވަރލްޑް ޓްރެވަލް އެވޯޑްސްއަކީ ފަތުރުވެރިކަމުގެ ދާއިރާގައި މުޅި ދުނިޔޭގައިވެސް ދެވޭ އެންމެ ޝަރަފްވެރި އެވޯޑެވެ.
