މިއީ ވަކި ޕާޓީއަކަށް ވެގެން ދައްކަން ޖެހޭ ވާހަކަތަކެއް ނޫނެވެ. ކޮންމެ ޕާޓީއަކަސް އަދި ސިޔާސީ ކޮންމެ ފިކުރެއް ހުރިކަމުގައި ވިޔަސް ދެކޮޅު ނުހެދޭނެ ހަގީގަތްތައް ހުންނާނެއެވެ. ދިވެހިރާއްޖޭގެ ހާލަތާއި ގައުމުގެ ޒުވާނުންގެ ހާލަތުގެ ވާހަކަ ޒުވާން އަންހެނެއްގެ ދުލުން ކިޔައިދިން އަޑު އިވުމުން ހިތަށް އެރިއެވެ. މިގައުމުގައި މިއަޑު އަހައި މިއާމެދު ވިސްނާލާ ކިތައް މީހުން ތިބޭނެބާވައެވެ.
ޑިމޮކްރެޓްސް ޖަލްސާގައި، ޓީވީއެމްގައި ޕްރެޒެންޓަރެއްގެ ގޮތުގައި މަސައްކަތްކޮށްފައިވާ އަދި މިހާރު ނޫސްވެރިކަން ކިޔަވާ، ފާތުމަތު ހަމްދާ ވާހަކަ ފެށީ ބަޔަކު 'މޭ ފުއްޕާލާފައި' ރާއްޖެ އަކީ ވަރަށް ހަމަޖެހޭ ސްޓޭބަލް ގައުމެކޭ ބުނާތީ، އެއީ ކިހާ ވަރެއްގެ ހަގީގަތެއް އޮތް ކަމެއްތޯ ކޮށްލި ސުވާލަކުންނެވެ. ހަމްދާ ވާހަކަ ފެށިއިރު ބުނި ގޮތަށް އެވާހަކަައަކީ ހަމައެކަނި ހަމްދާގެ ވާހަކައެއްނޫނެވެ. މިގައުމުގެ ގިނަ ޒުވާނުންގެ އިހުސާސްތަކެވެ. ރާއްޖޭގައި މިވަގުތު މެންޓަސް، ފިޒިކަލް، އިމޯޝަނަލް، ސައިކޮލޮޖިކަލް ފިޓްނެސް ނެތްކަމަށްވާއިރު ޒުވާނުންނަށް ހިތްވަރު ދެނީ އަމިއްލަ ފައިމައްޗަށް ތެދުވެ ދިރިއުޅުން ބައްޓަން ކުރާށޭ ކިޔަމުންކަމަށް ހަމްދާ ބުންޏެވެ.
ދިވެހިންގެ ދިރިއުޅުމުގެ ވައްޓަފާޅި މިހާރަކަށް އައިސް ބިނާވަމުން އަންނަ ގޮތުން ގިނަ އާއިލާތައް ވަނީ ރޫޅިފައެވެ. އަދުގެ މި ޖީލުގެ ދަރިން ބޮޑުވެފައި ތިބީ އާއިލީ ހަމަނުޖެހުންތަކާއި ކޯޅުންތަކާއި މައްސަލަތަކުގެ ތެރޭގައި އުޅެމުންނެވެ. މިހާސްކަމާއި ހަމަނުޖެހުމުގެ ތެރެއިން އާއިލީ ގުޅުންތަކާއި އާއިލީލޯބީގެ އެއްވެސް މުހިންމުކަމެއް ގަބޫލު ކުރެވޭނެ ގޮތެއް މިޖީލުގެ ދަރިންގެ ކިބައަކު ނެތެވެ. އާއިލީ ގުޅުންތައް ގަބޫލުކުރަން ބޭނުން ނުވެއެވެ.
ހަމްދާ ސިފަކޮށްދިނީ އަދު ރާއްޖޭގެ ގިނަ ދިރިއުޅުންތައް ބައްޓަންވެފައި އޮތް ގޮތެވެ. ހާއްސަކޮށް މާލެސަރަހައްދުގެ ގިނައާއިލާތަކުގެ ހާލަތު އެއްވެސް ފަރުދާއެއް ނެތި ހަމްދާގެ ވާހަކައިން ސިފަވެ މަންޒަރު ފެންނަހާވެއެވެ. ނަފުސާނީ ގޮތުން ގާބިލުކަމެއް ނެތް ހައިސިއްޔަތަކުން ދިރިއުޅުން ބައްޓަން ކުރާ ޒުވާނުންގެ ހާލަތު އެބަސްތަކުން ހާމަވެގެންދެއެވެ.
ހަމްދާ ބުނީ ތެދެކެވެ. އަދުގެ ޒުވާނުންގެ ދިރިއުޅެމުންދަނީ ކުލީ ތަންތަނުގައެވެ. ވަކިންތަނެއްގައި ނުވަތަ ކޮންމެވެސް ރައްޓެހިރަހުމަތްތެެރިންތަކަކާއެކު ނުވަތަ ކޮންމެވެސް އެހެން ބައިވެރިންތަކަކާއެކު ހިއްސާވާގޮތަށް ކުއްޔަށް އުޅޭމީހުންވެސް މަދެއްނޫނެވެ. ސަބަބަކަށް ވަނީ ހަމްދާ އެބުނިހެން "ރައްޔިތުން ދޮވެހުސްކުރާ' އުސޫލުން ދިރިއުޅުމުގެ ވައްޓަފާޅި ބިނާވެފައި އޮތުމެވެ. އިންތިހާއަށް އަގުބޮޑު ދިރިއުޅުމުގެ ހަރަދުބަރަދު ބެލުމަށް ދެތިން ވަޒީފާގެ އިތުރުން ފްރީލާންސްކޮށް މަސައްކަތް ކުރަންޖެހޭ ކަމަށް ހަމްދާ އެބުނީ ހާދަހާ ވާ ބޮޑު ތެދެކެވެ. ކިޔަވަން ކޮލެޖަށްވެސް ދާންޖެހެއެވެ. އެސައިންމެންޓްތައް ހަދަންވެސް ވަގުތު ހުސްކުރަންޖެހެއެވެ. މިއީ އަދި އެއްކަލަ ވަޒީފާ އެއަށްވުރެ ރަގަޅު ކުރަން ބޭނުންނަމަ ކުރަން މަޖުބޫރު އެހެން ކަންތައްތަކެވެ. މިއީ މުސްތަގުބަލަށްޓަކައި ކުރަން ޖެހޭ ކަންތަކެވެ. ހަމްދާގެ އަމިއްލަ ތަޖުރިބާއަކީ ހުދު އަޅުގަނޑުގެވެސް އަދި އެހެންވެސް ކިތަންމެ ޒުވާނުންނެއްގެ ހަގީގީ ދިރިއުޅުމުގެ ކުލަވަރެވެ.
ހަމްދާބުނިހެން "އަވަދިވެފައި" ތިބި ކިތަންމެ ޒުވާނުންނެއް އެބަތިއްބެވެ. ހަމްދާ ބުނީ ތެދެކެވެ. "ވޭލާއިން އަގުހެޔޮ ރީތި ހެދުމެއް ލައިގެން، ދިރާގުން އިންސްޓޯލްމެންޓަށް ސެމްސަންގް އެސް 22 އަލްޓްރާއެއް ނަގައިގެން އުޅުނެއް ކަމަކު އަޅުގަނޑުމެންގެ ހާލަތަކީ މިއީ އިނގޭތޯ،"
ދެންވެސް ހަމްދާ އަލިއަޅުވާލި ވާހަކައަކީ ވިސްނާލަންޖެހޭ ވަރުގެ ބޮޑު ވާހަކައެކެވެ. ގައުމުގެ އާބާދީ މަދުވުމުގެ ވާހަކައާއި ދަރިންހޯދުންއިތުރުކުރުމުގެ ވާހަކަ އަކީ މިގައުމުގެ އެންމެ ބޮޑު އެއްހާސްކަމަށްވެފައިވާއިރު މިދަތި ދިރިއުޅުން އަމިއްލަ ފުރާނައާ ކުޅެގެންހޯދާ ލޯބިވާ ދަރިންނަށް ދޭން އެދޭނީ ކާކުހެއްޔެވެ. ހަމްދާ އެބުނިހެން ގިނަ ދަރިންތަކެއް ބޭނުންވާ ހަމްދާފަދަ އަޅުގަނޑުފަދަ ކިތަންމެ ޒުވާނަކު ތިބޭނެއެވެ. އެކަމަކު ލޮލަށް ފެންނައަމިއްލަ އަށް ކުރެވެމުންދާ ވޭނީ ތަޖުރިބާއަށްފަހު އެވޭން އެހެންމީހަކު އުފުލަން އެއްބަހެއް ނުވެވެއެވެ.
"މިއީ ގިނަ ފަހަރު ޕަބްލިކް ޕޯޑިއަމެއްގައި މީހުން ހިއްސާކުރަން ބޭނުން ނުވާނެ ވާހަކަ ނަމަވެސް ހަގީގަތް. މިއީ މެންޓަލް އިންސްޓަބިލިޓީ،" ވަރަށް އަސަރާ އެކު ހަމްދާ ބުންޏެވެ.
ހަމްދާ ދެއްކި ވާހަކައިގައިވާ ކަންތައްތަކުގެ ހަގީގީ އަސަރާއި އޭގެ ދިލަހޫނުގެ އިހުސާސް އޭނާ ބުނިގޮތަށް "އަމިއްލަ ގެދޮރުގައި، ލަގްޒަރީ އެޕާޓްމެންޓުތަކުގައި، ހަތަރު އިރު ބޮޑެތި ކެއުންތައް ކައިގެން އުޅޭ މީހުންނަށް އިހުސާސް ނުކުރެވިދާނެ،"އެވެ.
ހުރިހާ ރައްޔިތުން ހިތްހަމަޖެހޭނެ ގޮތެއް ނޯންނާނެތީ އެންމެންގެ ހިތްހަމަޖައްސާނެހެން ސިޔާސަތުތަކެއް އެކުލަވާ ނުލެވިދާނެއެވެ. އެހެންނަމަވެސް ހުރިހާ ރައްޔިތުންނަށް ގެއްލުން ނުވާނެހެން، އެންމެ ކުޑަމިންވަރު ކާމިޔާބު ކުރެވިދާނެއެވެ. އަދި މިފަދަ ކަމެއް ކުރެވޭނީ އަމިއްލަ ފައިދާއަށް ވުރެ ރައްޔިތުންނަށް ބަލާ ސަރުކާރަކަށް ކަމަށް ހަމްދާ ވަނީ ބުނެފައެވެ.
ހަމްދާބުނީ ޒުވާނުން ގައުމު ދެކެ ލޯބިވާކަމަށާއި ހިދުމަތްކޮށް، ގައުމު ކުރިއަރުވަން ބޭނުންވާކަމަށެވެ. އެހެނެއްކަމަކު ދިރިއުޅުމުގެ ދުވަސް ނިމިގެން ދާއިރު ދިރިހުރުމަށް ލާން ޖެހޭ ހިތްވަރުގެ އިތުރުން އެހެން ހިތްވަރެއް ލާނެ ގާބިލްކަމެއް އެޒުވާނުންގެ ހަށީގައާއި ސިކުނޑީގައި ނުހުންނަކަމަށް ހަމްދާ ބުންޏެވެ. ހަމްދާ އާދޭސް ކުރިއެވެ. މިކަމަށް ހައްލެއް ހޯދައިދިނުމަށް އެދި އިންތިހާއަށް ވޭންހުރި އޭނާގެ ވާހަކަ ނިންމާލާފައި ވަނީ "ހެޔޮނުވާނެ، މި ކަމަށް ހައްލު ހޯދައިދީ." އިލްތިމާސަކުންނެވެ.
ކޮންމެ ސިޔާސީ ފިކުރެއްގައި ހުރި މީހެއްކަމުގައިވިޔަސް ގައުމު އޮތް ހާލަތަކާ ދެކޮޅެއް ނުހެދޭނެއެވެ. ފިކުރާއި ހިޔާލަކީ ތަފާތުއެއްޗެކެވެ. އެހެނަސް އެންމެންގެ ހައްގުގައި ހެޔޮކޮށް ކުރާ ކަމެއްނަމަ އެކަމެއް ވާނީ ހަމަ ހެޔޮކަމަކަށެވެ.
