މާލޭ ސަރަޙައްދުގެ ގެސްޓްހައުސްތައް އިންސްޕެކްޓްކުރުމުގެ މަސައްކަތް ފަށައިފިއެވެ.
ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހެލްތު އިމަޖެންސީ އޮޕަރޭޝަންސް ސެންޓަރުގެ ތަރުޖަމާނު ޑރ ނަޒްލާ ރަފީގު ވިދާޅުވީ، 6 ޖެނުއަރީގައި މާލޭގެ 12 ގެސްޓްހައުސްްއެއް އިންސްޕެކްޓް ކޮށްފައިވާ ކަމަށާއި 7 ޖެނުއަރީގައި ހުޅުމާލޭގެ 18 ގެސްޓްހައުސްއެއް އިންސްޕެކްޓް ކޮށްފައިވާ ކަމަށެވެ.
ޖުމްލަކޮށް ހުރިޙާ ގެސްޓްހައުސްއެއްވެސް ހިންގަމުން އަންނަނީ ގައިޑްލައިނާއި އެއްގޮތަށްކަމަށް ޑރ ނަޒްލާ ވިދާޅުވިއެވެ.
ކޮވިޑް-19ގެ ސަބަބުން ގެސްޓްހައުސްތަކާއި ހޮޓާތައް ބަންދުކޮށްފައި އޮތުމަށްފަހު، މާލެ ސަރަހައްދުގެ ހޮޓާތަކާއި ގެސްޓްހައުސްތައް ހުޅުވުމުގެ ހުއްދަ ސަރުކާރުން ދެއްވާފައިވަނީ އަތޮޅުތަކުގެ ގެސްޓްހައުސްތައް ހުޅުވާލިތާ ދެ މަސް ދުވަސް ފަހުން މިދިޔަ ޑިސެމްބަރުމަހުގެ 14 ވަނަ ދުވަހުއެވެ.
މާލެ ސަރަހައްދުން މިހާތަނަށް 40 ގެސްޓްހައުސްއެއް ހުޅުވާފައިވާއިރު، އަތޮޅުތަކުގެ ތެރެއިން 235 ގެސްޓްހައުސްއެއް ހުޅުވުމުގެ ހުއްދަދީ އަންނަނީ އޮޕަރޭޓް ކުރަމުންނެވެ.
