ގއ. ދެއްވަދޫއިން ކޮވިޑު-19 އަށް ޕޮޒިޓިވްވީ މީހުންނާ ގުޅޭ ކްލަސްޓާއިން ޕޮޒިޓިވްވީ މީހުންގެ އަދަދު 22 އަށް އަރައިފިއެވެ.
ހެލްތު އިމަޖެންސީ އޮޕަރޭޝަން ސެންޓަރ(އެޗްއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ހެޑް އޮފް ކޮންޓެކްޓު ޓްރޭސިން ކްލަސްޓަރ އިބްރާހިމް ނިޒާމް ވިދާޅުވީ ދެއްވަދޫން ޕޮޒިޓިވްވީ މީހުންނާއި ގުޅޭ ޕޮޒިޓިވް ކޭސްތަކެއް ދެއްވަދޫގެ އިތުރުން ހުޅުމާލެ އާއި ލ. ފޮނަދޫއިން ފެނިފައިވާ ކަމަށެވެ.
ނިޒާމް ވިދާޅުވީ މި ކްލަސްޓަރ އާއި ގުޅުން ހުރި ދެ ފަރާތެއް ހުޅުމާލެއިން ފެނިފައިވާ އިރު 4 މީހަކު ލ. ފޮނަދޫއިން ފެނިފައިވާ ކަމަށެވެ. އަދި މި މީހުންގެ ކޮންޓެކްޓު ޓްރޭސިން ހަދަމުން އަންނަ ކަމަށެވެ.
ދެއްވަދޫން ޕޮޒިޓިވްވީ ފަރާތްތަކާއި ކޮންޓެކްޓު ވެފައިވާ 149 މީހަކު ދެނެގަނެވިފައިވާ އިރު ލ. ފޮނަދޫން ޕޮޒިޓިވްވީ 4 މީހުންނާއި ބައްދަލުވި 56 ފަރާތެއް ދެނެގަނެވިފައިވާ ކަމަށް ނިޒާމް ވިދާޅުވިއެވެ.
ނިޒާމް ވިދާޅުވީ މިވަގުތު ދެއްވަދޫގައި ބަލި ޖެހިފައިވާ 18 މީހުން އެބަތިބިކަމަށެވެ. އެމީހުންގެ ތެރެއިން 8 މީހަކީ ރަށު ތެރެއިން ނެގި ރެންޑަމް ސާމްޕަލްތަކުގެ ތެރެއިން ޕޮޒިޓިވްވީ މީހުންނެވެ. މި ކްލަސްޓަރ އާއި ގުޅުން ހުރި މީހުންގެ ޓެސްޓުތައް ހަދަމުން އަންނަ އިރު ލ. ފޮނަދޫން އިއްޔެ ހެދި ޓެސްޓު ތަކުގެ ތެރެއިން 14 މީހެއްގެ ނަތީޖާ ވަނީ ނެގެޓިވްވެފައެވެ.
