ގއ. ދެއްވަދޫގައި ކޮވިޑް-19 ފެތުރުގޮތް އަދިވެސް ނުހޯދޭ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން ބުނެފި އެވެ.
މިދިޔަ މަހުގެ 24 ވަނަ ދުވަހު ދެއްވަދޫން ކޮވިޑް-19ގެ އެންމެ ފުރަތަމަ ކޭސް ރިޕޯޓުކޮށްފައިވާއިރު އެންމެ ފުރަތަމަ ޕޮޒިޓިވްވީ އެރަށަށް ކަރަންޓީނަށް ދިޔަ އާއިލާއަކުން ހަތަރު މަހުގެ ކުޑަ ކުއްޖެކެވެ. ނަމަވެސް އެ އާއިލާއިން އިތުރު މީހަކު ޕޮޒިޓިވްވެފައެއް ނުވެއެވެ.
އެޗްއީއޯސީގައި މިރޭ ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ، މިހާތަނަށް ފެނުނު ކޭސްތަކަށް ބަލާއިރު، ދެއްވަދުއިން މާ ކުރިން ކޮވިޑް ފެތުރިފައިވާކަން އެނގޭ ކަމަށެވެ.
"މި ރަށުގައި ބަލި ފެތުރެމުންދިޔަތާ ދުވަސްކޮޅެއްވެދާނެކަމަށް ލަފާ ކުރެވޭ. އަދި މިއީ ސީދާ ކަރަންޓީންގައި ހުރި މީހަކު ޕޮޒިޓިވްވެ، އެމީހާގެ ފަރާތުން ފެތުރުމުގެ ކަމެއްގެ ބަދަލުގައި ކޮންމެވެސް އެހެން ގޮތަކުން ބަލި އިންޓްރޮޑިއުސްވެގެން ކޮންމެވެސް ވަރަކަށް ރަށުތެރޭ ޓްރާސްމިޓްވެގެން، ސާކިއުލޭޓްވެގެން މިހާތަނަށް ބެލި ކޭސްތަކަށް ބަލާއިރު ފާހަގަ ކުރެވެނީ،" ނަޒްލާ ވިދާޅުވިއެވެ.
ޑރ. ނަޒްލާ އިތުރަށް ވިދާޅުވީ އެރަށުގެ ކޮންޓެކްޓް ޓްރޭސިންގެ މަސައްކަތްތައް އަދިވެސް މުޅިން ނުނިމޭ ކަމަށެވެ. ބަލީގެ ހަލަތާއި ބަލި އައި އަސްލު ހޯދޭނީ އެ މަސައްކަތްތައް ނިމުމުން ކަމަށް ވިދާޅުވިއެވެ.
ދެއްވަދޫ އިން ކޮވިޑް-19ގެ ފުރަތަމަ ކޭސް ފެނުނީ މިދިޔަ މަހުގެ 24 ގަ އެވެ. އޭގެ ފަހުން މި މަހު ހައެއްގައިި އެއް ކޭސް ފެނުނު އިރު ހަތެއްގައި ވެސް އިތުރު ހަ ކޭސް ފެނިފައި ވެއެވެ. އެ ކޭސްތަކާ ގުޅިގެން މިހާރު އެރަށުގައި 200 ރެންޑަމް ސާމްޕަލް ނެގުމުގެ މަސައްކަތްކުރަމުން އަންނަ އިރު އޭގެ ތެރެއިން ވެސް ބައެއް މީހުން ޕޮޒިޓިވްވެފައި ވެއެވެ.
