ރައީސް އިބްރާހިމް މުހައްމަދު ސާލިހް ގެންދަވަނީ ދައުލަތުގެ ފައިސާ ބޭނުން ކުރައްވައިގެން މަޖިލިސް މެންބަރުންނާއި އެހެންވެސް މީހުންނަށް ރިޝްވަތު ދެއްވަމުން ކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު މިއަދު ތުހުމަތުކުރައްވައިފިއެވެ.
އެމަނިކުފާނު އެކްސްގައި މިއަދު ކުރެއްވި ޓްވީޓެއްގައި ވިދާޅުވީ، ރައީސް ސާލިހް އެފަދައިން ލަދެއް ނެތި، ބިރެއް ނެތި ދައުލަތުގެ ފައިސާ ބޭނުންކުރައްވައިގެން މަޖިލިސް މެމްބަރުންނާއި އެހެންވެސް މީހުންނަށް ރިޝްވަރު ދެއްވަމުންގެންދަވާ ކަމަށާއި އެކަމުން ރައީސް ސާލިހަށްވާނެ މޮޅެއް ނޯންނާނެކަމަށެވެ.
އަދި މީހުންނަށް ރިޝްވަތު ދެއްވާނަމަ ރައީސް ސާލިހް ފަޟީހަތް ވެގެންދާނެކަމަށްވެސް ރައީސް ނަޝީދުވަނީ ވިދާޅުވެފައެވެ.
ރައީސް ނަޝީދު މިހެން ވިދާޅުވެފައި މިވަނީ ދަ ޑިމޮކްރެޓްސްގައި ހުންނެވި ތޮއްޑޫ ދާއިރާގެ މެންބަރު ހަސަން ޝިޔާން އެ ޕާޓީ ދޫކުރައްވައި އިއްޔެ އަލުން އެމްޑީޕީއާ ގުޅިވަޑައިގެންފައިވަނިކޮށެވެ.
ޝިޔާނަކީ ދަ ޑިމޮކްރެޓްސް އުފެއްދުމަށް އެމްޑީޕީން ފުރަތަމަ ވަކިވެވަޑައިގެންނެވި މަޖިލިސް މެންބަރުންގެ ތެރޭގައި ހިމެނިވަޑައިގަންނަވާ ބޭފުޅެކެވެ.
