ފަސިންޖަރެއްގެ ލަގެޖުން މަނާ ކަމަށް ޝައްކު ކުރެވޭ އެއްޗެއް ފެނުމުން ފަޖިންސަރު ޓާމިނަލެއް ހުސްކޮށް އިނގިރޭސި ފުލުހުން ވަނީ ލަންޑަންގެ ގެޓްވިކް އެއާޕޯޓަށް ބޮން ނައްތާލާ ޓީމެއް ފޮނުވާފަ އެވެ.
އިނގިރޭސިވިލާތުގެ ދެވަނައަށް އެންމެ ބިޒީ އެއާޕޯޓް ކަމަށްވާ ގެޓްވިކް އޮންނަނީ ލަންޑަނުގެ ދެކުނުން ގާތްގަނޑަކަށް 30 މޭލު ދުރުގަ އެވެ.
ފުލުހުން ބުނެފައި ވަނީ ސަލާމަތީ ހާދިސާއަކާ ގުޅިގެން ސައުތު ޓާމިނަލްގެ ބޮޑު ބައެއް ހުސްކޮށްފައިވާ ކަމަށެވެ.
މި ހާދިސާގެ ސަބަބުން ހަފްތާ ބަންދުގައި ދަތުރުކުރާ އެތައް ހާސް ފަސިންޖަރުންގެ ދަތުރު ޕްލޭންތަކަށް ބުރޫއަރާފައި ވެއެވެ.
ހުކުރު ދުވަހު އެކަނިވެސް ގެޓްވިކް އިން 600 އަށް ވުރެ ގިނަ ފްލައިޓް ޖައްސައި ނައްޓާލަން ޖެހެއެވެ. އެއީ ގާތްގަނޑަކަށް 121 ހާސް ފަސިންޖަރު ސީޓެވެ.
އިތުރު އެހެން ހާދިސާއެއްގައި މިއަދު ލަންޑަންގައި އެމރިކާ އެމްބަސީ ކައިރިންވެސް ކޮންޓްރޯލު މާހައުލެއްގައި ފުލުހުން ގޮތް ނޭނގޭ އެއްޗެއް ހޯދައިގެން ގޮއްވާލާފައި ވެއެވެ. ފަހުން އެނގުނު ގޮތުގައި އެއީ ބޮމެއް ނޫނެވެ.
