ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުއަށް މަރުހަބާ ކިޔަން ފުވައްމުލަކު އަދާލަތު އުފެއްދި ބޭފުޅުން ފެހި ކުލައިގެ ޓީޝާޓުގައި ނިކުތުން އަދާލަތު ޕާޓީން އެކަން ކުށްވެރި ކޮށްފިއެވެ.
މުއިއްޒަށް މަރުހަބާ ކިޔުމަށް ފެހި ޓީޝާޓުގައި ފުވައްމުލަކުން ނުކުމެފައިވަނީ އަދާލަތު ޕާޓީ ވުޖޫދުވިއިރު އެ ޕާޓީއާ ގުޅުނު ފުވައްމުލަކު އިސް، ފައުންޑިން މެންބަރުންތަކެވެ. އެމީހުން މުއިއްޒަށް މަރުހަބާ ދަންނަވަން ނުކުތީ މިހާރު އޮތް އާދަލަތު ޕާޓީއަށް ތާއިދު ނުކުރާކަން ހާމަކުރުމަށެވެ.
މިކަމާ ކަންބޮޑުވުން ފާޅު ކުރައްވައި، އަލީ ނަޒީރު ކުރެއްވި ޓުވީޓެއްގައި ވިދާޅުވީ، ޑރ. މުއިއްޒުގެ ކެމްޕޭނުގައި އަދާލަތު ޕާޓީގެ ކުލަ ބޭނުންކުރާކަން ފާހަގަކުރެވިފައިވާތީ އެކަން ހަރުކަށި އިބާރާތުން ކުށްވެރިކުރާ ކަމަށެވެ. އަދި އެކަމަކީ އިންތިހާބާ ބެހޭ އާންމު ގާނޫނުގެ ދަށުން މަނާކަމަކަށްވާތީ އެކަން ހުއްޓުވަން އިލެކްޝަންސް ކޮމިޝަނަށް ގޮވާލާ ކަމަށްވެސް އަލީ ނަޒީރު ވަނީ ވިދާޅުވެފައެވެ.
މުއިއްޒުގެ ސިޔާސީ ހަޔާތް ފެއްޓެވި އަދާލަތު ޕާޓީ މިވަގުތު އޮތީ ރައީސް އިބްރާހިމް މުހައްމަދު ސާލިހާ އެކު ކޯލިޝަނުގައެވެ. ޕާޓީގެ އިސް ބޭފުޅުން ގެންދަވަނީ ރައީސްސާލިހާއެކު ކެމްޕޭނު ކުރައްވަމުންނެވެ. އެހެންނަމަވެސް ރަށްރަށުގައި ތިއްބެވި އަދާލަތުގެ މެމެމްބަރުން ތާއީދު ކުރައްވަނީ، ޕީއެންސީގެ ކެންޑިޑޭޓް ޑރ. މުއިއްޒަށެވެ.
