ވާދަވެރިންގެ ތެރޭގައި މި ގައުމަށް ކަމެއް ކޮށްދޭނެ ބަޔަކު ނެތް ކަމަށާއި، ފުރުސަތު ލިބުނު އިރު އެއްވެސް ކަމެއްކޮށް ނުދެއްވިހާލު، މާޒީގައި ރައްޔިތުންނަށާއި ރައްޔިތުންގެ ފައިސާއަށް ވީ އިހުމާލު ކަމަށް އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް މިހެން ވިދާޅުވީ، މިއަދު މެންދުރު ތ. ދިޔަމިގިއްޔަށް ވަޑައިގެން މިއެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ.
ދިޔަމިގިއްޔަށް ކޮށްދެއްވާނެ ކަންތައްތަކުގެ ވައުދުވެވަޑައިގެންނެވުމަށްފަހު ރައީސް ވިދާޅުވީ މިވޭތުވެދިޔަ ތަނުގައި ރާއްޖޭގައި ތަރައްގީގެ މަޝްރޫއުތައް މިއިން ދުވަހަކު ނުހިނގާވަރަށް މިދިޔަ ފަސްއަހަރު ތެރޭގައި ހިނގާފައިވާ ކަމަށެވެ.
އެއީ ފެނާއި ނަރުދަމާ ކަމަށްވިޔަސް ބަނދަރުކަމަށް ވިޔަސް، ކަރަންޓު ކަމަށްވިޔަސް، އަދި ސިއްހީކަމެއްކަމުގައި ވިޔަސް ނުވަތަ ތައުލީމީ ކަމެއް ކަމަށްވިޔަސް، އެތަރައްގީ ގެނެވިފައިވަނީ މިފަސް އަހަރު ދުވަހުގެ ތެރޭގައި ކަމަށް ރައީސް ވަނީ ވިދާޅުވެފައެވެ. ހަމައެހެންމެ ވޭތިވެދިޔަ ފަސް އަހަރުތެރޭގައި މި ތަރައްގީ ގެނައުމުގައި ކުރަމުން ދިޔަ މަސައްކަތްތަކުގެ ތެރޭގައި ކުރިމަތިވި ދަތިތަކާއި އުނދަގޫތަކަކީ ރާއްޖޭގެ ކޮންމެ ރައްޔިތަކު ވިސްނާފިކުރުކޮށްލަން ޖެހޭނެ ކަމެއްކަމަށްވެސް ރައީސް ވަނީ ވިދާޅުވެފައެވެ.
ކޮވިޑުގެ ހާލަތުގައި ކަންތައްވެގެން ދިޔަ ގޮތުގެ ހަނދާން އައު ކުރައްވައި ރައީސް ސާލިހު ވިދާޅުވީ ރާއްޖެއަށް، ރާއްޖޭގެ ރައްޔިތުންނަށް، ތަރައްގީއަށް ކަމެް ކޮށްދޭން އުޅުއްވާ ބަޔަކު ނެތްކަމަށެވެ. އެހެނީ ފުރުސަތު ލިބިލެއްވި އިރު އެއިން ކަމެއް ކޮށްދެއްވާފައި ނުވާހާލު، ރައްޔިތުންގެ ފައިސާއަށާއި ރައްޔިތުންނަށް ވެފައި އޮތީ އިހުމާލުކަމަށެެވެ.
ކަންތައް ދިމާވެފައި އޮތް ގޮތާމެދު ވަރަށް ރަނގަޅަށް ވިސްނެވުމަށާއި އިދިކޮޅު ފަރާތަކުން، ނުވަތަ އެއިން ޕާޓީއަކުން ވެސް ރާއްޖޭގެ ވެރިކަމަށް އައިސްފިނަމަ ކަންތައްވެގެންދާނެ ގޮތާމެދު ވިސްނައި ފިކުރުކޮށްލަން ޖެހޭކަމަށްވެސް ރައީސް ވަނީ ވިދާޅުވެވަފައެވެ.
ރައީސް ސާލިހު ވިދާޅުވީ ކުރިއަށް މިއޮތް ފަސް އަހަރު ތަރައްގީގެ މަގުގައި އިތުރު އެތައް ކަމެއް ފުއްދައިދޭނެ ފަސްއަހަރު ކަމަށެވެ.
