އޭވިއޭޝަން ސެކިއުރިޓީ ކޮމާންޑުގެ އޮފިސަރުންގެ ތަމްރީނާއި ތަޖުރިބާ އިތުރުކުރުމަށް ސްޓަޑީ ޓުވާއެއްގައި އިންޑިޔާއަށް މިއަދު ފުރައިފިއެވެ.
އެއާރޕޯޓުތަކުގެ ސަލާމަތީ ކަންކަން ބަލަހައްޓާ އޭވްސެކްގެ މުވައްޒަފުން، އިންޑިޔާ ސަރުކާރުގެ އެހީގައި ކުރިއަށް ގެންދާ މި ޓުވާގައި ޓިކެޓުތައް ހަވާލުކޮށްދެއްވީ އެކަމަށްޓަކައި އެމްއޭސީއެލްގެ ކޯޕަރޭޓް އޮފީހުގައި ބޭއްވި ރަސްމިއްޔާތެއްގައި އިންޑިޔާ އިން ރާއްޖެއަށް ކަނޑައަޅާފައި ހުންނަ އެމްބެސެޑަރު މުނޫ މަހާވަރުއެވެ.
މީގެ އިތުރުން މި ޓުވާތަކުގެ ބޭނުންތެރިކަމާ ބެހޭގޮތުން އޭވްސެކްގެ ޑިރެކްޓަރު އަލީ އަސްގަރު ވިދާޅުވީ ބަދަލުވަމުންދާ ދުނިޔޭގެ ހާލަތާ އެކީ ފާޅުވަމުން އަންނަ ނުރައްކާތަކަށް ފާރަވެރި އޮފިސަރުންތަކެއް ތިބުން މުހިންމު ކަމަށެވެ.
އަދި އަލީ އަސްގަރު ވަނީ މިކަން ފަހިކޮށްދޭން ދިވެހި ސަރުކާރާއި އިންޑިޔާ ސަރުކާރު ގުޅިގެން ވަމުންދާ އެހީއަށް ޝުކުރު އަދާކުރައްވާފައެވެ.
މިއީ ސްޓަޑީ ޓުވާގައި އޭވްސެކްގެ އޮފިސަރުން ފޮނުވާ 2 ވަނަ އަހަރެވެ.
މިދިޔަ އަހަރު 20 އޮފިސަރަކު މި ޓުވާގައި ބައިވެރިވާ އިރު ރާއްޖޭގައި އޮންނަ ކޮންމެ އެއާރޕޯޓަކުން މަދުވެގެން 1 އޮފިސަރަކު ހިމެނޭހެން 30 އޮފިސަރުން ބައިވެރިވާނެ ކަމަށް އޭވްސްކޮމްއިން ބުނެއެވެ
