1 ޑިސެންބަރު 2024 އިން ފެށިގެން ދިވެހިރާއްޖޭގެ އެއަރޕޯޓުތަކުން ބޭރަށް ފުރާ ފަސިންޖަރުންގެ އަތުން ނަގާ ޑިޕާޗަރ ޓެކުހާއި އެއަރޕޯޓް ޑިވެލޮޕްމަންޓް ފީގެ ރޭޓުތަކަށް ބަދަލު އަންނާނެކަމަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން މިއަދު އިއުލާނުކޮށްފިއެވެ.
މި ބަދަލު އަންނަނީ ދިވެހިރާއްޖޭގެ އެއަރޕޯޓަކުން ދިވެހިރާއްޖޭން ބޭރަށް ފުރާ ފަސިންޖަރުންގެ އަތުން ޓެކުހާއި ފީ ނެގުމާބެހޭ ޤާނޫނަށް ގެނެވުނު 2 ވަނަ އިޞްލާޙުގެ ދަށުންނެވެ. މި ބަދަލާ އެކު، އިކޮނޮމީ ކްލާހުގައި ދަތުރުކުރާ ބިދޭސީންގެ އަތުން ނަގާ ޑިޕާޗަރ ޓެކްސް އަދި އެއަރޕޯޓް ޑިވެލޮޕްމަންޓް ފީ 50 އެމެރިކާ ޑޮލަރަށް އިތުރުވާނެއެވެ.
އެހެންނަމަވެސް، އިކޮނޮމީ ކްލާހުގައި ދަތުރުކުރާ ދިވެހިންގެ އަތުން ނަގާ ޓެކްސް އަދި ފީގެ އަދަދު މިހާރުވެސް ނަގަމުން އަންނަ 12 އެމެރިކާ ޑޮލަރުގައި ދެމިހުންނާނެކަމަށް މީރާއިން ހާމަކޮށްފައިވެއެވެ. ބިޒްނަސް ކްލާސް، ފަސްޓް ކްލާސް އަދި ޕްރައިވެޓް ޖެޓްގައި ދަތުރުކުރާ ފަރާތްތަކުގެ އަތުން ނަގާ ޓެކްސް އަދި ފީގެ އަދަދުތަކަށްވެސް ބަދަލުތަކެއް އަންނާނެއެވެ.
އިކޮނޮމީ ކްލާސް ފިޔަވައި އެހެން ކްލާސްތަކުގެ ޑިވެލޮޕްމަންޓް ފީ އަދި ޑިޕާޗަރ ޓެކްސްގެ ރޭޓުތަކަށްވެސް ބަދަލުތަކެއް އަންނާނެކަމަށް މީރާއިން ހާމަކޮށްފައިވެއެވެ. އެގޮތުން، ބިޒްނަސް ކްލާހުގައި ދަތުރުކުރާ ފަރާތްތަކުގެ އަތުން، ދިވެހިންނާއި ބިދޭސީން ވަކިނުކޮށް، ޑިޕާޗަރ ޓެކްސްގެ ގޮތުގައި 120 އެމެރިކާ ޑޮލަރު އަދި އެއަރޕޯޓް ޑިވެލޮޕްމަންޓް ފީގެ ގޮތުގައި 120 އެމެރިކާ ޑޮލަރު ނެގޭނެއެވެ.
ފަސްޓް ކްލާހުގައި ދަތުރުކުރާ ދިވެހިންނާއި ބިދޭސީންގެ އަތުން، ޑިޕާޗަރ ޓެކްސްގެ ގޮތުގައި 240 އެމެރިކާ ޑޮލަރު އަދި އެއަރޕޯޓް ޑިވެލޮޕްމަންޓް ފީގެ ގޮތުގައި 240 އެމެރިކާ ޑޮލަރު ނެގޭނެއެވެ. އަދި ޕްރައިވެޓް ޖެޓްގައި ދަތުރުކުރާ ދިވެހިންނާއި ބިދޭސީންގެ އަތުން، ޑިޕާޗަރ ޓެކްސްގެ ގޮތުގައި 480 އެމެރިކާ ޑޮލަރު އަދި އެއަރޕޯޓް ޑިވެލޮޕްމަންޓް ފީގެ ގޮތުގައި 480 އެމެރިކާ ޑޮލަރު ނެގޭނެއެވެ.
މި ބަދަލުތަކާއެކު، އިކޮނޮމީ ކްލާސް ފިޔަވައި އެހެން ހުރިހާ ކްލާސްތަކެއްގައި ދަތުރުކުރާ ފަރާތްތަކުގެ އަތުން ނެގޭ ޓެކްސް އަދި ފީގެ އަދަދު އިތުރުވެގެންދާނެއެވެ. މި ބަދަލުތައް ތަންފީޒުކުރެވޭނީ 1 ޑިސެންބަރު 2024 އިން ފެށިގެންކަން މީރާއިން އަންގާފައިވެއެވެ
މީރާއިން އިތުރަށް ފާހަގަކޮށްފައިވާ ގޮތުގައި، އެއަރޕޯޓު ޑިވެލޮޕްމަންޓް ފީ ނަގާނީ ހަމައެކަނި ވެލާނާ އިންޓަރނޭޝަނަލް އެއަރޕޯޓުން ބޭރަށް ފުރާ ފަސިންޖަރުންގެ އަތުންނެވެ. އެހެން އެއަރޕޯޓުތަކުން ފުރާ ފަސިންޖަރުންގެ އަތުން ނަގާނީ ޑިޕާޗަރ ޓެކްސް އެކަނިއެވެ.
މި އައު ބަދަލުތައް ތަންފީޒުކުރެވޭނީ 1 ޑިސެންބަރު 2024 ގައި ނުވަތަ އޭގެ ފަހުން ދަތުރުކުރުމަށް ޓިކެޓު ގަންނަ ނުވަތަ ފުރާ ދުވަސް ބަދަލުކުރާ ފަސިންޖަރުންނަށެވެ.
މި ބަދަލުތަކާ ގުޅޭގޮތުން އިތުރު މަޢުލޫމާތު ހޯދުމަށް ބޭނުންވާ ފަރާތްތަކަށް މީރާގެ ހޮޓްލައިން 1415 އަށް ގުޅުމަށް ނުވަތަ [email protected] އަށް އީމެއިލް ކުރުމަށް މީރާއިން އިރުޝާދު ދީފައިވެއެވެ.
