ރައީސް މަސްވެރިންނަށް ހާއްސަ އިންޝިއުރަންސްއެއް ތައާރަފްކުރައްވާނެކަމަށް އެމްއެންޕީގެ ރިޔާސީ ކެންޑިޑޭޓް މުޙައްމަދު ނާޒިމް ވިދާޅުވެއްޖެއެވެ.
ގއ. ވިލިގިނލީގައި ރޭ ބޭއްވި ކެމްޕެއިން ޖަލްސާގައި ވާހަކަފުޅު ދައްކަވަމުން ނާޒިމް ވިދާޅުވީ ކުރީ ސަރުކާރުތަކުގައި މަސްވެރިންނަށް ވަރަށް ބޮޑަށް އިހުމާލުވެފައިވާކަމަށާއި މަސްވެރިންނަށް މިހާތަަނަށް އޮތް އެންމެ ބޮޑު ދައްޗަކީ މަސްވެރިންނަށް ބޭންކުތަކުން ލޯނު ހޯދުމަށް އޮތް ދަތިކަންކަމަށެވެ.
މީގެއިތުރުން އެއީ މަސްވެރިންގެ އޮތް އެންމެ ބޮޑު އެއް ކަންބޮޑުވުންކަަމަށް ވިދާޅުވެ ނާޒިމް ވަނީ މަސްވެރިންގެ އެ މައްސަލައަށް ހައްލެއް ގެނެސްދެއްވާނެކަމަށެވެ. އަދި މަސްވެރިންނަށް ހާއްސަ އިންޝިއުރަންސްއެއް ތަޢާރަފްކޮށް، 20 އަހަރު ތެރޭ ފައިސާ ލިބޭނެގޮތް ހަމަޖައްސަވާނެކަމަށްވެސް އެމަނިކުފާނު ވަނީ ވިދާޅުވެފައެވެ.
އަދި މަސްވެރިންނަށް މަސްކިރުވުމުގައި ހުރި ދަތިތައް ހައްލުކޮށްދެއްވާނެކަަމަށާއި އެގޮތުން ކޫއްޑޫގައި 200 ޓަނު މަސް ބަންދުކުރެވޭނޭ ކާރުހާނާއެއް ޤާއިމްކުރައްވާނެކަމަށާއި އަދި 1،500 ޓަނުގެ މަސް ކިރޭނޭ ނިޒާމެއް ވެސް އެރަށުގައި ގާއިމްކުރައްވާނެކަމަށްވެސް ނާޒިމް ވިދާޅުވިއެވެ.
އެމަނިކުފާނަކީ ވަނީ ވިލިނގިލީގައި ދޯނި އެހެލުމަށް ޚާއްޞަ ސަރަހައްދެއް ތަރައްގީކޮށްދެއްވުމަށްވެސް ވަޢުދުވެވަޑައިގެންފައެވެ. އަދި ކުޅިވަރުގެ ވަސީލަތްތައް ޤާއިމްކޮށްދީ ކޫއްޑުއާއި ބްރިޖަކުން ގުޅާލުމަށްވެސް ނާޒިމް ވަނީ ވަޢުދުވެވަޑައިގެންފައެވެ.
