ރިޔާސީ އިންތިހާބުގެ ވޯޓުގެ ސިއްރުކަން ގެއްލުވާލަން އުޅޭކަމަށް ބުނެ މޯލްޑިވްސް ނޭޗަނަލް ޕާޓީ (އެމްއެންޕީ) އިން ކަންބޮޑުވުންފާޅުކޮށް އިލެކްޝަންސް ކޮމިޝަނަށް ޝަކުވާ ހުށައަޅައިފިއެވެ.
އެމްއެންޕީން އީސީއަށް ފޮނުވި ސިޓީއެއްގައިވަނީ ރިޔާސީ އިންތިހާބުގައި ވަކި ކުލައެއްގެ ގަލަމުން ވޯޓު ކަރުދާހުގައި ފާހަގަޖެހުމަށް ސަރުކާރުގެ ބައެއް ކުންފުނިތަކުން މުވައްޒަފުންނަށް އަންގައި، ވޯޓުގެ ސިއްރުކަން ގެއްލުވައިލަން މަސައްކަތް ކުރަމުންދާކަމަށް ތުހުމަތުކޮށްފައެވެ. އެފަދަ ޝަކުވާތައް އެޕާޓީއަށް ލިބެމުން އަންނަކަމަށްވެސް ސިޓީގައިވެއެވެ.
މީގެ އިތުރުން އެފަދަ އަމަލުތަކަކީ ގާނޫނުއަސާސީގައި ބަޔާންކޮށްފައިވާގޮތަށް ވޯޓުގެ ސިއްރުކަން ގެއްލިދާނެ ފަދަ އަމަލެއްކަމަށް ބުނެފައިވެއެވެ. އަދި ނުރަނގަޅު ނުފޫޒެއް ނެތި، މިނިވަން އަދި އިންސާފުވެރި އިންތިހާބެއްކަން ކަށަވަރުކުރުމަށްޓަކައި، އެފަދަ ކަންކަމާމެދު މެދު މަޝްވަރާކުރަން ގައުމީ ލަފާދޭ ކޮމިޓީގެ ބައްދަލުވުމެއް ބާއްވައި ދިނުމަށްވެސް އެ ޕާޓީން އެދިފައިވެއެވެ.
އެމްއެންޕީން މި ޝަކުވާ އީސީއަށް ހުށައަޅާފައިވާއިރު ޓްރާންސްޕޭރެންސީ މޯލްޑިވްސްއިން އަދި ސިޔާސީ ބައެއް ޕާޓީތަކުންވެސް ވަނީ ދައުލަތުގެ މުދަލާއި ވަސީލަތް އަދި މުވައްޒަފުން އިންތިހާބަށް ބޭނުންކުރަމުންދާކަމަށް ތުހުމަތުކޮށްފައެވެ.
ދައުލަތުގެ މުދާ ނަހަމަ ގޮތުގައި ބޭނުންކުރުމަކީ ޤާނޫނު އަސާސީގައި ބަޔާންކުރާ މިނިވަން އިންސާފުވެރި އިންތިޚާބަކަށް ހުރަސް އެޅޭނެކަމެއްގެ ގޮތުގައި އެމްއެންޕީން ސިފަކޮށްފައިވެއެވެ.
