ކުޑަކުއްޖަށް ޖިންސީ ގޯނާކުރި ކަމުގެ ތުހުމަތުގައި ދައުވާކޮށް ޝަރީއަތް ހިނގަމުންދާ މީހަކު އެމްޑީޕީގެ ކެމްޕެއިނުގައި އިސްކޮށް ހަރަކާތްތެރިވާ ކަމަށް ބުނެ ސޯޝަލް މީޑިއާގައި ވީޑިއޯތައް ދައުރުވާން ފެށުމުން އެމީހާ ކެމްޕެއިނުން ދުރުކޮށްފައިވާ ކަމަށް އެމްޑީޕީގެ ރިޔާސީ ކެންޑިޑޭޓް އަދި ރައީސް އިބްރާހިމް މުހައްމަދު ސާލިހްގެ ކެމްޕޭނު ތަރުޖަމާނު މާރިޔާ އަހްމަދު ދީދީ މިއަދު ވިދާޅުވެއްޖެއެވެ.
ޑިފެންސް މިނިސްޓަރުކަންވެސް ކުރައްވަމުން ގެންދަވާ މާރިޔާ މިހެން ވިދާޅުވީ، ސޯލްޓް ކެފޭ ހިންގާ އިމާރާތުގައި ގާއިމްކޮށްފައިވާ އެމްޑީޕީގެ ކެމްޕެއިން އޮފީހުގައި ދެއްކެވި ވާހަކަފުޅުގައެވެ. ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުވާ މީހެއް ނަމަ އެ މީހަކާ އެމްޑީޕީން ދުރުވާނެކަން ފާހަގަ ކުރައްވައި މާރިޔާ ވިދާޅުވީ ޝާހީން ކެމްޕެއިނުން ދުރުކޮށްފައިވާ ކަމަށެވެ.
ކުޑަކުއްޖަކަށް ޖިންސީ ގޯނާކުރި މައްސަލައިގައި، ދައުވާ އުފުލާފައިވާ އިބްރާހިމް ޝާހީން ނަމަކަށް ކިޔާ މީހަކު، އެމްޑީޕީގެ ހުޅުމާލެ ހަރުގޭގައި ލަވަ ކިޔާ ވީޑީއޯތަކެއް ސޯޝަލް މީޑިއާގައި އާއްމުވެ ގިނަ ބައެއްގެ ފާޑުކިޔުން އަމާޒުވަމުން އަންނަތާ ދުވަސްކޮޅެއްވެއްޖެއެވެ.
2017 ވަނަ އަހަރުން ފެށިގެން އެކި ދުވަސް މަތިން ކުޑަކުއްޖަކާ އެކީ ޖިންސީ އަމަލު ހިންގި ކަމުގެ ތުހުމަތުގައި ޝާހީންގެ މައްޗަށް ދައުވާ އުފުލާފައިވަނީ 2019 ވަނަ އަހަރުގެ ތެރޭގައެވެ. ޝާހީންގެ މައްޗަށް އުފުލާފައިވަނީ އިތުބާރު ކުރެވެންޖެހޭ މަގާމެއްގައި ހުރެ ކުޑަކުއްޖަކާ އެކީ ޖިންސީ އަމަލު ހިންގި ކަމުގެ ދައުވާއެވެ. އެ މައްސަލައިގައި މިހާތަނަށް ވެސް ޝާހީން ހައްޔަރެއްނުކުރެއެވެ.
އެ މައްސަލަ މިހާރު އޮތީ، ހުޅުމާލޭ ކޯޓުގައި ހެކިބަސް ނެގުމުގެ މަރުހަލާގައެވެ.
