ވާރޭ ވެހި ފެން ބޮޑުވާ ރަށްރަށަށް ނޭޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ފެން ހިންދާ ޕަންޕު ފޯރުކޮށްދީފިއެވެ.
އެންޑީއެމްއޭއިން ބުނީ މިއީ ރަށްރަށަށް ފެންބޮޑުވުމުން ލިބޭ ގެއްލުން ކުޑަކުރުމުގެ ގޮތުން އެންޑީއެމްއޭއިން އެކުލަވާލައިފައިވާ ޕްރޮޖެކްޓެއްގެ ދަށުން ހަވާލު ކުރެވޭ ޕަންޕު ތަކެއް ކަމަށެވެ.
އެގޮތުން މި ޕްރޮޖެކްޓުގެ ދަށުން ފެންހިއްކާ ޕަންޕު ހަވާލު ކުރުމަށް ހަމަޖެހިފައިވާ ފުރަތަމަ ފަސް ރަށަށް މިހާރު ޕަންޕު ހަވާލު ކޮށްފައިވާ ކަމަށް އެ އޮތޯރިޓީން ބުނެފައިވެެއެވެ.
އޭގެތެރޭގައި ހިމެނެނީ
- ބ. މާޅޮސް
- ބ. ކެންދޫ
- ބ. ތުޅާދޫ
- އަދި ޅ.ނައިފަރުގެ އިތުރުން ޅ.ހިންނަވަރެވެ.
އެންޑީއެމްއޭއިން ބުނީ ބާކީ 13 ރަށަށް ވެސް ވަރަށް އަވަހަށް ފެން ހިންދާ ޕަންޕާއި، އެއާއެކު އިތުރަށް ބޭނުންވާ ސާމާނު ވަރަށް އަވަހަށް ފޯރުކޮށްދޭނެ ކަމަށެވެ.
މީގެ އިތުރުން އެންޑީއެމްއޭއިން ބުނީ އެ ރަށްތަކާއި، އެ ތަކެތި ހަވާލު ކުރުމަށް އެންޑީއެމްއޭ އާއި ޑިފެންސް މިނިސްޓްރީ އަދި ސިފައިންގެ ޓީމެއް ވަނީ އެ ރަށްތަކަށް ޒިޔާރާތް ކޮށްފައި ކަމަށާއި މި ޓީމުގައި ޑިފެންސް މިނިސްޓްރީގެ ނައިބު ހުސެން ޒާހިރު ބައިވެރިވެ ވަޑައިގަތްކަމަށެވެ
އެމަނިކުފާނުގެ އަރިހުގައި ޑިޒާސްޓާ މެނޭޖްމަންޓް އޮތޯރިޓީގެ ސީއީއޯ ހިސާން ހަސަން އަދި ވައިސް ޗީފް އޮފް ޑިފެންސް ފޯސް މޭޖާ ޖެނެރަލް އަބްދުއްރަހީމް އަބްދުއްލަތީފްގެ އިތުރުން ސިފައިންގެ ނޮދަން އޭރިޔާ ކޮމާންޑްގެ އިސް އޮފިސަރުން ވެސް ވަނީ ބައިވެރިވެވަޑައިގެންފައެވެ.
1.4 މިލިއަން ރުފިޔާ ހަރަދު ކޮށްގެން ސަރުކާރުން ހިންގާ މި ޕްރޮޖެކްޓަކީ، ގުދުރަތީ ކާރިސާ ތަކުގެ ސަބަބުން ބޮޑެތި ގެއްލުންތައް ތަހަންމަލު ކުރަން ޖެހޭ ރަށްތަކުގެ ތެރެއިން ވަސީލަތް ނެތް 18 ރަށަކަށް އެކަމަށް ބޭނުންވާ ވަސީލަތްތައް ފޯރުކޮށްދިނުމަށް ފެށި ޕްރޮޖެކްޓެކެވެ.
