އިނގިރޭސި ޕްރިމިއަރ ލީގުގައި ރޭ އަމިއްލަ ދަނޑުގައި ޓޮޓެންހަމް އަތުން 4-0 މެންޗެސްޓަރ ސިޓީ ބަލިވެއްޖެއެވެ.
މިއީ ސިޓީ، ޖެހިޖެހިގެން މިސީޒަނުގައި ބަލިވި 5 ވަނަ މެޗެވެ. އަނެއްކޮޅުން މިއީ ސިޓީގެ ކޯޗު ޕެޕް ގާޑިއޯލާގެ ކޯޗިންގ ކެރިޔަރުގައިވެސް ޖެހިޖެހިގެން 5 މެޗުން ބަލިވި ފުރަތަމަ ފަހަރެވެ.
މެޗް ފެށުމުގެ ކުރިން، ސިޓީގެ ތަރި ސްޕެއިނުގެ ރޮޑްރީއަށް ދާދިފަހުން ލިބުނު ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ އެވޯޑް (ބެލޮންޑިއޯ) ސަޕޯޓަރުންނަށް ދައްކާލުން އޮތެވެ. ސިޓީ، ޖެހިޖެހިގެން 5 މެޗުން ބަލިވެފައި މިވަނީ ރޮޑްރީީގެ ކަކުލަށް އަނިޔާވުމާއި ގުޅިގެން، އޭނާ ނެތްތަން ފޫބައްދާނެ ހަލެއް ގާޑިއޯލާއަށް ހޯދިފައި ނުވާތީ ކަމަށް ތަޖުރިބާކާރުން ދެކެއެވެ.
ޓޮޓެންހަމްއިން ރޭ ސިޓީގެ ގޯލު ހުޅުވާލީ 13 ވަނަ މިނެޓުގައި ޖޭމްސް މެޑިސަންގެ ލަނޑުންނެވެ. އޭގެ 7 މިނެޓް ފަހުން ލީޑް ފުޅާކޮށްދިނީވެސް އޭނާއެވެ. ދެވަނަ ހާފް ފަށައިގެން ސިޓީއަށް ހިންދެމި ނުލެވި އުޅެނިކޮށް ޕެޑްރޯ ޕޮއްރޯގެ ލަނޑުން ސިޓީއަށް ދެން މިމެޗުގައި ޓޮޓެންހަމް އަތުލުނެވޭނެކަން ގާތްގަނޑަކަށް ޔަގީން ކުރިއެވެ. ޓޮޓެންހަމްއިން 4 ވަނަ ލަނޑު ޖެހީ މެޗުގެ އިތުރު ވަގުތުގައެވެ. މި ލަނޑު ކާމިޔާބު ކޮށްދިނީ ވޭލްސްގެ އުއްމީދީ ފޯވާޑް ބްރެއްނަން ޖޯންސަންއެވެ.
މި ބައްޔަކީ 2003 ވަނަ އަހަރު އަމިއްލަ ދަނޑުގައި އާސެނަލް އަތުން 5-1 އިން ބަލިވުމަށްފަހު އަމިއްލަ ދަނޑުގައި ސިޓީއަށް ކުރިމަތިލާން ޖެހުނު އެންމެ ތަފާތު ބޮޑު ބައްޔެވެ.
މިމެޗުން ބަލިވިނަމަވެސް 23 ޕޮއިންޓާއެކު ސިޓީ އަދިވެސް އޮތީ 2 ވަނައިގައެވެ. އެއްވަނައިގައި 28 ޕޮއިންޓާއެކު އޮތީ ލިވަޕޫލެވެ. މިރޭ ސައުތެމްޓަން އަތުން ލިވަޕޫލް މޮޅުވެއްޖެނަމަ ތާވަލުގެ ކުރީގައި ލިވަޕޫލަށް 11 ޕޮއިންޓުގެ ލީޑެއް ލިބޭނެއެވެ.
