ސައުތު އެފްރިކާގެ ވެރިރަށް ޖޮހްނަސްބާގުގެ މެދު ތެރޭގައި ހުރި އިމާރާތެއްގައި ރޭ ދަންވަރު ހިނގި އަލިފާނުގެ ހާދިސާއެއްގައި 64 މީހުން މަރުވެއްޖެއެވެ.
މިހާދިސާ ހިނގީ ޖޮހްނަސްބާގުގެ ވިޔަފާރީގެ މައި ޑިސްޓްރިކްޓް ތެރޭގައި 5 ބުރިއަށް ހަދާފައި ހުރި މިއިމާރާތެއްގައެވެ. ސަރުކާގެ އޮފިޝަލަކާ ހަވާލާދީ އަލްޖަޒީރާއިން ބުނީ މިހާދިސާ ހިނގަން މެދުވެރިވީ އެސަރަހައްދަށް ފިނިކަމުން އިމާރާތުގައި ދިރިއުޅުނު ބަޔަކު އެޕާޓްމަންޓެއް ތެރޭގައި ހޫނު ކުރަން ބޭނުން ކުރި އަލިފާނުގެ ސަބަބުން ކަމަށެވެ. މިދުވަސްވަރު ޖޮހްނަސްބާގުގެ ފިނިހޫނުމިން ހުރީ 17 ޑިގްރީ ސެލްސިއަސްގައެވެ.
އަލިފާން ނިއްވުމުގެ މަސައްކަތުގައި ހަރަކާތްތެރިވާ ފަޔަރ ފައިޓަރުންނާ ހަވާލާދީ އެސޯސިއެޓޭޓް ޕްރެސް (އޭޕީ) އިން ބުނީ އަނދާއަޅިއަށްވެފައިވާ އިމާރާތުގެ ތެރެއިިން ދިރިހުރި މީހަކު ފެނުމަކީ ވަރަށް ދުރު ކަމެއް ކަމަށެވެ. "ފަޔަރ ފައިޓަރެއް ގޮތުގައި މިދިޔަ 20 އަހަރު ދުވަހު އަހަރެން މަސައްކަތް ކުރިއިރުވެސް މިވަރުގެ ބޮޑު ހާދިސާއަކާ ކުރިމައްޗެއް ނުވޭ" މަލައުޑްޒީ ބުންޏެވެ.
މިހާދިސާގައި މަރުވި މީހުންގެ ތެރޭގައި އެއްއާއިލާއެއްގެ 7 މީހުން ހިމެނެއެވެ. މީގެ ތެރޭގައި އެއްއަހަރުގެ ކުޑަކުއްޖަކުވެސް ހިމެނެއެވެ. އޮފިޝަލުން ލަފާ ކުރާ ގޮތުގައި މިއިމާރާތުގައި ދުއިސައްތައެއްހައި މީހުން ދިރުއުޅެއެވެ. މީގެ ތެރޭގައި ގިނައީ ރަށްފުށު ހިސާބުތަކުން ޖޮހްނަސްބާގުން ރަނގަޅު ފުރުސަތުތައް ހޯދުމަށް ހިޖުރަ ކޮށްފައިވާ މީހުންނެވެ.
މަންޒަރު ދުށް މީހުންނާއި ހަވާލާދީ އެޕީއިން ބުނީ އަލިފާނުގެ ހާދިސާ ހިނގުމުން ބައެއް މީހުން އިމާރާތުގެ ކުޑަދޮރުތައް ހަލާކުކޮށްލައިގެން ތިރިއަށް ފުންމާލި ކަމަށާއި އަލިފާންގަނޑު ފެތުރިގަނެގެން ދިޔައީ ހީވެސް ނުކުރާހާ ބާރު ސްޕީޑެއްގައި ކަމަށެވެ.
