ދިވެހި ރައްޔިތެއްކަން އަންގައިދޭ ކާޑް ޕްރިންޓްކޮށް ދޫކުރުމުގެ ހިދުމަތް ހުޅުމާލެއާއި ވިލިމާލޭގައި ފަށައިފިއެވެ.
މި ހިދުމަތުުގެ އިތުރުން ޕާސްޕޯޓު ދޫކުރުމުގެ ހިދުމަތް ރައްޔިތުންނާ ގާތުން އަވަހަށް ފޯރުކޮށްދިނުމުގެ ކަންކަން މުޅި ރާއްޖެއަށް ފުޅާކުރުމުގެ މަޝްރޫއު، މިމަހު 16 ވަނަ ދުވަހު ރައީސް ޑރ. މުއިއްޒު އިފްތިތާހުކޮށްދެއްވާފައިވާއިރު، މި މަޝްރޫއުގެ ދަށުން މީހުން ދިރިއުޅޭ ހުރިހާ ރަށެއްގައި ހިދުމަތްތައް ގާއިމްކުރަންވަނީ ހަމަޖެހިފައެވެ.
އެގޮތުން އިއްޔެ އަލަށް ފެށި އައިޑީ ކާޑު ޕްރިންޓުކޮށް، ހައްދައިދިނުމުގެ ހިދުމަތް ލިބޭނެ އޮފީސްތަކަކީ ވިލިމާލޭއިން އީ ބްލޮކް، ގްރައުންޑް ފްލޯއާއި ހުޅުމާލޭގެ ފުރަތަމަ ފިޔަވަހިން އުމަރު ޒާހިރު ބިލްޑިންގ، ގްރައުންޑް ފްލޯއާއި ހުޅުމާލޭގެ ދެވަނަ ފިޔަވަހި - ވިނަރެސް ޓަވަރ 2، ފަސްޓް ފްލޯއެވެ.
ޑީއެންއާރުގެ 174 ކަލެކްޓިން ސެންޓަރު ގާއިމުކޮށްފައިވާއިރު ފުރަތަމަ ފަހަރަށް އޮންލައިންކޮށް އައިޑީ ކާޑު ހެދުމުގެ މަަސައްކަތް ފެށީ ކޮވިޑާ ގުޅިގެން 2021 ވަނަ އަހަރުއެވެ. ކުރިން ބޭނުން ކުރަމުން އައި އޮންލައިން ޕޯޓަލްގެ ބަދަލުގައި ޑީއެންއާރު އޮންލައިން ޕޯޓަލްއެއް ގާއިމުކޮށް، އަމިއްލައަށް ކާޑަށް ހުށަހެޅޭގޮތް ހަމަޖެއްސީ މިދިޔަ އަހަރުގެ މާޗު މަހުގެ ތެރޭގައެވެ.
ސަރުކާރުގެ އަމާޒަކީ އައިޑީކާޑު ހައްދައިދިނުމުގެ ހިދުމަތް މުޅި ރާއްޖެއަށް ފުޅާކުރުމުގެ މަޝްރޫއު އަންނަ އަހަރަށް ނިންމުމެވެ.
