އެމަނިކުފާނުގެ އާއިލާގެ އެއްވެސް ބޭފުޅަކަށް ސަރުކާރުން ވަޒީފާއެއް ދެއްވާފައި ނުވާނެ ކަމަށާއި ކުރިއަށްއޮތް ތަނުގައިވެސް ނުދެއްވާނެ ކަމަށް އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް މިފަދައިން ހާމަކުރައްވާފައި ވަނީ، ސަންގު ޓީވީ އާއި ޕީއެސްއެމް ގުޅިގެން ކުރިއަށްގެންދިޔަ "ސަންގު ބަހުސް"ގައި ވާހަކަފުޅުދައްކަވަމުންނެވެ.
އެކި މަގާމުތަކުގައި އާއިލީ ބޭފުޅުން ތިއްބަވާ ކަމަށް ބުނެ، ކުރި ސުވާލަށް ޖަވާބުދެއްވަމުން ރައީސް ވިދާޅުވީ ސީޕީ ހަމީދަށް ވަޒީފާ ދޭން ހުކުމް ކުރީ ކޯޓުންކަމަށާއި އަދި ރައްޔިތުންގެ މަޖިލީހަށް ނިޔާޒާއި ޖީހާން އިންތިހާބުވެވަޑައިގެންނެވީ ރައްޔިތުންގެ ވޯޓުން ކަމަށެވެ.
ރައީސް ސާލިހުގެ ސެކްރެޓަރީއަކަށް ހުންނެވި ފާތޭއަކީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުން ފެށިގެން ވެސް ރައީސް އޮފީހުގައި މަސައްކަތްކުރައްވާ ބޭފުޅެއް ކަމަށާއި އެއީ ސަރުކާރު ދެމެހެއްޓުމަށްޓަކައި ސަރުކާރުގައި ތިބެން ޖެހޭނެ ދުވަސްވީ ތަޖުރިބާ ހުރި ބޭފުޅުން ކަމަށްވާތީ ވަޒީފާއިން ވަކިނުކުރައްވާ ކަމަށް ރައީސް ސާލިހު ވަނީ ވިދާޅުވެފައެވެ.
ސަރުކާރު ވަޒީފާއަކުންއެއްވެސް މީހަކު ވަކިކޮށްފައެއް ނުވާނެ ކަމަށާއި އެމަނިކުފާނުގެ ސަރުކާރަކު އެމަނިކުފާނުގެ އާއިލާގެ މީހަކަށް ވަޒީފާ ނުދެއްވާ ކަމަށާއި އަދި ކުރިއަށްއޮތް ތަނުގައިވެސް އެގޮތަށް ވަޒީފާ ނުދެއްވާނެކަމަށް ރައީސްސާލިހު ވަނީ ވިދާޅުވެފައެވެ.
ރައްޔިތުންގެ ކުރިމަތީގައި މިކަހަލަ ދޮގު ހެދުމަކީ ރައީސްކަން ކުރާ މީހަކާއި އެކަށީގެންވާ ކަމެއްނޫން. ހަމީދަށް ޕޮލިސް ކަމިޝަނަރުކަން ދިނީ ކޯޓުންނޯ.