އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި ވޯޓުލުމަށްޓަކައި، ވޯޓުލާ މަރުކަޒުތަކުގައި ބަހައްޓާ ވޯޓުލާ ބޫތުތަކާއި ވޯޓު ކަރުދާހުގައި ފާހަގަ ޖަހާފާނެ ގޮތަކާބެހޭ ބައެއްކަހަލަ ކަންބޮޑުވުންތައް ސިޔާސީ ޕާޓީތަކުން އިލެކްޝަންސް ކޮމިޝަން (އީސީ) އަށް ހުށަހަޅާފައިވާކަމަށް އެ ކޮމިޝަނުން ބުނެފިއެވެ.
އިސީގެ ނާއިބު ރައީސް އިސްމާއިލް ހަބީބު ވިދާޅުވީ، ވޯޓުލާ މަރުކަޒުގައި މިހާރު އީސީން ބަހައްޓަމުންދާ ބޫތު ބަހައްޓާ ގޮތުން، ފޮޓޯ ނެގުމާއި އަދި ޖީބުން ކަރުދާސްކޮޅެއް ނަގައިގެން އޭގެ ބޭނުންކުރުން ކަހަލަ ކަމެއް ކޮށްފާނެ ކަމަށް ގަބޫލު ކުރެވޭތީ ޕާޓީތަކުގެ ކަންބޮޑޫވުންތަކެއް އެބަހުރި ކަމަށެވެ.
އަދި އެކި ކުލަކުލައިން ފާހަގަ ޖެހުމާއި، އެއް ފާހަގައަށްވުރެ ގިނަ ފާހަގަ ޖަހާ ވާހަކައިގެ ޝަކުވާ ޕާޓީތަކުން ކޮށްފައިވާ ކަމަށްވެސް ހަބީބު ވަނީ ވިދާޅުވެފައެވެ.
ހަބީބު ވިދާޅުވީ، އެކަންކަމާބެހޭގޮތުން ލަފާދޭ ކޮމިޓީއާ މަޝްވަރާކޮށް އެބޭފުޅުންގެ ހިޔާޅުވެސް ހުށަހަޅާފައިވާ ކަމަށެވެ. އެހެންކަމުން އެކަންކަމާ ބެހޭގޮތުން، އީސީގެ ބައްދަލުވުމެއް ބޭއްވުމަށްފަހު އެކަމުގައި އީސީން ނިންމާގޮތެއް އާންމު ކުރާނެ ކަމަށްވެސް ހަބީބު ވަނީ ވިދާޅުވެފައެވެ. ކުރިންވެސް ވިދާޅުވެފައިވާ ވާހަކައެއް ތަކުރާރު ކުރައްވަމުން ހަބީބު ވިދާޅުވީ، އިންތިހާބުގެ ސިއްރުކަން ގެއްލި، އިންތިހާބަށް ނުފޫޒު ފޯރުވުމަށް އިންތިހާބުގެ އެއްވެސް ހިސާބަކުން އެއްވެސް ފަރާތަކަށް އީސީން ފުރުސަތު ނުދޭނެ ކަމަށެވެ.
ރައްޔިތުންނާއި ސިޔާސީ ޕާޓީތަކުގެ ކަންބޮޑުވުން އަޑުއަހައި ވޯޓުގެ ސިއްރުކަން ކަށަވަރުކޮށް، އެމީހާ އަމިއްލަ އިހުތިޔާރުގައި ވޯޓުލުމަށް ކުރަން ބޭނުންވާ ކޮންމެ ކަމެއް ގާނޫނާއި ގަވާއިދުގެ އިމުގެ ތެރެއިން ކޮށްދިނުމަށް އީސީ އޮތީ ތައްޔާރަށް ކަމަށްވެސް ހަބީބު ވިދާޅުވިއެވެ.
ބައެއް ސިޔާސީ ޕާޓީތަކުން އީސީއަށް ބައެއް ތުހުމަތުތައް ކުރަމުންދާކަން ފާހަގަ ކުރައްވައި، ހަބީބު ވިދާޅުވީ، ސިޔާސީ ގޮތުން ބައެއް ކަހަލަ ވާހަކަތައް އަޑުއިވުނަސް އިންތިހާބުގެ އެއްވެސް ހިސާބެއްގައި މަކަރެއް، ހަމަނުޖެހުމެއް ހިނގުމުގެ ފުރުސަތެއް ނުދެއްވާނެކަމަށެވެ.
ހަބީބު ވިދާޅުވީ، މިފަހަރުގެ ވޯޓުލާ ބޫތުތައް އިންތިޒާމު ކޮށްފައި ވަނީވެސް ވޯޓުލާ މީހާގެ ހުރިހާ ހަރަކާތެއް މޮނިޓަރ ކުރެވޭ ގޮތަށް ކަމަށެވެ. ވޯޓުލާ މީހާ ފާހަގަ ޖަހާއިރު އޭނާގެ ހަރަކާތްތައް ފެންނަ ގޮތަށް ވޯޓުލާ މަރުކަޒު އިންތިޒާމު ކުރާނެކަމަށާއި އެހެންކަމަށްވުމާއެކު ވޯޓުލާ ފަރާތުގެ ހަރާތްތައް ބެލުމަށް އޮބްޒާވަރުންނާއި މޮނިޓަރުންނާއި ކެންޑިޑޭޓުންގެ މަންދޫބުން ތިއްބަވާނެކަމަށާއި އަދި ހަމައެހެންމެ، އީސީގެ އޮފިޝަލުންވެސް އެކަމަށް ފާރަވެރިވާނެކަމަށް ހަބީބު ވަނީ ވިދާޅުވެފައެވެ.
ވޯޓުލާން އަންނަ މީހާ ބޭރުން ކަރުދާސް ގެނަޔަސް ވޯޓު ފޮއްޓަށް ލުމާއި ވޯޓުލާން ދާ މީހާ ވޯޓު ކަރުދާސްކޮޅު ފޮރުވައިގެން ބޭރަށް ގެންދިއުމާ ގުޅޭ ގޮތުން ނޫސްވެރިން ފާޅު ކުރި ކަންބޮޑުވުމަށް ޖަވާބުދެއްވަމުން، ހަބީބު ވިދާޅުވީ، ވޯޓު ލުމަށް ވޯޓު ކަރުދާސް ދޫކުރާނީ އީސީން ތައްގަނޑެއް ޖެހުމަށްފަހުގައި ކަމަށާއި، އެހެންކަމުން ބޭރުން ގެނަޔަސް ފޮއްޓަށްލާ ކަރުދާސް ކޮޅެއްގެ ސައްހަ ކަމެއް ނޯންނާނެ ކަމަށެވެ.
އިންތިހާބާ ބެހޭ ޝަކުވާތައް މީޑިއާ އާއި ސޯޝަލް މީޑިއާގައި ދެއްކުމުގެ ބަދަލުގައި އެ އޮންނަ އުސޫލުން ޝަކުވާ ހުށަހެޅުމަށް ވެސް ހަބީބު ވަނީ އިލްތިމާސްކުރައްވާފައެވެ.
