ޖުމްހޫރީ ޕާޓީގެ ސްލޮޓްގައި އިކޮނޮމިކް މިނިސްޓްރީގެ ޑެޕިއުޓީ މިނިސްޓަރު ހުސައިން ޒާމިރު މަގާމުން މިއަދު އިސްތިއުފާ ދެއްވައިފިއެވެ.
ޒާމިރު ޑެޕިއުޓީ މިނިސްޓަރު ކަމުގެ މަޤާމުގައި ހުންނެވީ ޖުމްހޫރީ ޕާޓީގެ ސްލޮޓްގައި ކަމަށްވާއިރު އެބޭފުޅާގެ އިސްތިއުފާ ސިޓީ މިއަދު ވަނީ ރައީސުލްޖުމްހޫރިއްޔާއަށް އަރިސްކޮށް އަދި މީސްމީޑިއާގައިވެސް ހާމަކޮށްފައެވެ.
ނަމަވެސް ޒާމިރުގެ ސިޓީގައި އިސްތިއުފާ ދެއްވި ވަކި ސަބަބެއް ވިދާޅުވެފައެއް ނުވެއެވެ. ނަމަވެސް އޭނާ އިސްތިއުފާ ދެއްވީ ރިޔާސީ އިންތިހާބުގައި ރައީސް އިބްރާހީމް މުހައްމަދު ސޯލިހަށް ލިބިވަޑައިގެންނެވި ބޮޑު ނާކާމިޔާބީއާ ގުޅިގެން ކަމަށް ބެލެވެއެވެ.
އިސްތިއުފާގެ ސިޓީއާ އެކު ފޭސްބުކްގައި ކުރައްވާފައިވާ ޕޯސްޓެއްގައި ޒާމިރު ވިދާޅުވީ ރައްޔިތުން އެމީހުންގެ އަޑު އިއްވައިފި ކަމަށެވެ.
ރިޔާސީ އިންތިހާބުގެ ޖުމްހޫރީ ޕާޓީގެ ލީޑަރު ގާސިމް އިބްރާހީމް ވެސް ވާދަކުރެއްވިއެވެ. ގާސިމަށް މި އިންތިހާބުގައި ލިބިވަޑައިގަތީ 5،524 ވޯޓެވެ. އެއީ 2.5 އިންސައްތަ ވޯޓެވެ.
ޖުމްހޫރީ ޕާޓީން ރޭ ވަނީ އެޕާޓީގެ ލީޑަރޝިޕްގެ ބޭފުޅުންނާއި ބައްދަލުކޮށްފައެވެ. އެމަޝްވަރާ ތަކަށްފަހު ވަރަށް އަވަހަށް ގޮތެއް ނިންމާނެކަމަށް ވަނީ ބުނެފައެވެ.
