ރިޔާސީ އިންތިހާބުގެ ދެވަނަ ބުރުގައި ރަށްވެހިވެފައިވާ ތަން ނޫން އެހެން ތަނަކަށް ވޯޓުލުމަށް، ރީ-ރަޖިސްޓްރީ ވުމަށް ބޭނުންކުރާ އޮންލައިން ޕޯޓަލްގެ އެކްސެސް އެ ކޮމިޝަނުގެ ކުރީގެ މެންބަރަކަށް ނޯންނާނެ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
އީސީ އިން މިހެން ބުނެފައި ވަނީ މިއަދު ނެރުނު ބަޔާނެއްގައެވެ.
އީސީގެ މެންބަރުކަމުން ވަކިވި، އަލީ ނަޝާތު ވަނީ އެ ކޮމިޝަނުގެ އެހެން މެމްބަރުންނަށް ވަގަށް, ރީ-ރަޖިސްޓްރޭޝަން ޕޯޓަލްގެ ބެކްޑޯއެއް ހެދުމަށްފަހު އެމްޑީޕީއަށް އޭގެ އެކްސެސް ދީފައިވާ ކަމަށް ރާއްޖޭގެ އޮންލައިން ނޫހަކުން ވަނީ ރިޕޯޓުކޮށްފައެވެ. އަދި މޫކައި ސޫޓްސްގައި އެމްޑީޕީން ހަދާފައިވާ ކެމްޕެއިން އޮފީހުގައި ތިބި ފަރާތްތަކުން އެ ޕޯޓަލަށް އެކްސެސް ވަމުންދާ ކަމަށްވެސް ވަނީ ތުހުމަތުކޮށްފައެވެ.
މި ތުހުމަތުތަކާ ގުޅިގެން އީސީން މިއަދު ނެރުނު ބަޔާނުގައި ބުނީ، ރީ-ރަޖިސްޓަރީވުމަށް ބޭނުންކުރާ ޕޯޓަލަކީ 2020 ގެ ކައުންސިލް އިންތިހާބަށް ފަހު ބޭއްވި ހުރިހާ އިންތިހާބެއްގެ ރީ-ރަޖިސްޓްރޭޝަނަށް ބޭނުންކުރަމުން އައި ޕޯޓަލް ކަމަށާއި އެ ޕޯޓަލަކީ ރައްޔިތުންނާއި ހުރިހާ ސިޔާސީ ޕާޓީއެއްގެ އިތުބާރު ލިބިފައިވާ ޕޯޓަލެއް ކަމަށެވެ.
އީސީން ބުނީ ޕޯޓަލްގެ މަސައްކަތަކީ އައިޓީ ސެކިއުރިޓީ ކޮންސަލްޓެންޓެއްގެ ލަފައާއި އިރުޝާދުގެ މަތިން ބަލަހައްޓަމުންގެންދާ މުހިންމު މަސައްކަތެއްކަމުގައި އާއި ޕޯޓަލްގެ އެކްސެސް ކޮމިޝަންގެ ކުރީގެ މެންބަރަކަށް ނުވަތަ ކަމާ ނުބެހޭ އެއްވެސް މީހަކަށް ނޯންނާނެކަމުގެ ޔަގީންކަން އެ ކޮމިޝަނުން އަރުވާ ކަމުގައެވެ.
އީސީން ބުނީ ރީ-ރަޖިސްޓްރޭޝަންގެ އޮންލައިން ޕޯޓަލްއާ މެދު ރައްޔިތުންގެ ހިތުގައި ޝައްކު އުފެދޭގޮތަށް ބައެއް ފަރާތްތަކުން ފަތުރަމުންދާ ހަބަރަކީ ހަގީގަތާ ހިލާފު ހަބަރެއް ކަމަށެވެ. އަދި އެ ކޮމިޝަނާއި ރައްޔިތުންނާއި އަދި ކެންޑިޑޭޓުންނާ ދެމެދު އޮތް އިތުބާރު ގެއްލޭފަދަ ގޮތްގޮތަށް ހަގީގަތާ ހިލާފު ވާހަކަތައް ނުފެތުރުމަށްވެސް އީސީ އިން ވަނީ އިލްތިމާސްކޮށްފައެވެ.
އިންތިހާބުގެ ދެވަނަ ބުރަށް ރީ-ރަޖިސްޓްރީވުމަށް އީސީން ހުޅުވާލީ މިދިޔަ ހުކުރު ދުވަހު ހަވީރު ތިނެއް ޖެހިއިރުއެވެ. މުއްދަތު ހަމަވީ އިއްޔެ ހަވީރު ހަތަރަކަށެވެ.
އީސީން މިއަދު ބުނީ، ދެވަނަ ބުރަށް ރީރަޖިސްޓްރީ ކުރުމަށް ދިން ތިން ދުވަހުގެ ތެރޭގައި އޮންލައިންކޮށާއި އެ ކޮމިޝަންގެ ކައުންޓަރުތަކަށް އަދި އަތޮޅުތަކުގެ ފޯކަލްޕޮއިންޓް މެދުވެރިކޮށް ހުށަހެޅި 47،000 އަށްވުރެ ގިނަ ފޯމުގެ ތެރެއިން 19،000 ވުރެ ގިނަ ފޯމު ޕްރޮސެސްކޮށް ނިމިފައިވާ ކަމަށެވެ. އަދި 27،000 ވުރެ ގިނަ ފޯމެއްގެ ސައްހަކުރުމުގެ މަރުހަލާގައިވާ ކަމަށް ވެސް އެކޮމިޝަނުން ވަނީ ހާމަކޮށްފައެވެ.
ރީ-ރަޖިސްޓަރީ ކުރުމަށް ހުށަހަޅާ ފޯމުތައް ވެރިފައިކޮށް ނިމުމުން، ވޯޓުލުމަށް ރީ-ރަޖިސްޓްރީ ލިސްޓު ސަރުކާރުގެ ގެޒެޓުގައި އާންމުކޮށް ކެންޑިޑޭޓުންނާއި ޕާޓީތަކާ ހިއްސާކޮށް ޝަކުވާއަށް ދެ ދުވަހުގެ ފުރުސަތެއް ހުޅުވާލާނެ ކަމަށްވެސް އީސީ އިން ވަނީ ބުނެފައެވެ.
