މިސަރުކާރުގެ އެގްރޯ ނެޓުގެ މެނޭޖިންގ ޑިރެކްޓަރުކަން އަދާކުރެއްވި ހާރޫން ރަޝީދާއެކު ސަތޭކައެއްހައި މީހުން އިންތިހާބުގެ ދެވަނަ ބުރުގައި ޕީއެންސީ/ޕީޕީއެމްގެ ރިޔާސީ ކެންޑިޑޭޓް ޑރ މުހައްމަދު މުއިއްޒަށް ތާއީދުކޮށް ގއ.ވިލިނގިލިން ޕީޕީއެމާ ގުޅިއްޖެއެވެ.
ޑރ.މުއިއްޒާއި އަނބިަނބަލުން ސާޖިދާ މުހައްމަދު އަދި މުއިއްޒުގެ ޓީމް ރެއިން ފެށިގެން ދެކުނުގެ 4 އަތޮޅަކަށް ކުރައްވަމުން ގެންދަވާ ދަތުރުގައި މިއަދު ވިލިނގިއްޔަށް ވަޑައިގެންނެވުމުން އެރަށުން ވަނީ ވަރަށްވެސް ހޫނު މަރުހަބާއެއް ދަންނަވާއެވެ.
ހާރޫންގެ އިތުރުން ވިލިނގިލީގެ ހޮސްޕިޓަލުގެ މެނޭޖިންގ ޑިރެކްޓަރުކަން އަދާކުރެއްވި، އަދި މިސަރުކާރުގެ ޖެންޑަރ މިނިސްޓްރީގެ ސީނިއަރ އެގްޒެކްޓިވް އައިމަން ރަޝީދާއި ވިލިނގިލި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރު ރިފާޢަތު ރަޝީދާއި ފެނަކަ ވަޒީފާގައި އެތައް އަހަރަކު އަދި އެމްޑީޕީ އުފެދުނީއްސުރެ އެޕާޓީގައި މަސައްކަތްކުރެއްވި އެތައް ބަޔަކު ވަނީ ޕީޕީއެމާއި ގުޅިފައެވެ. އަދި ކޫއްޑޫ މަސް ކުންފުންޏާއި، އެއރޕޯޓްގައި މަސައްކަތްކުރައްވާ އެތައް ބަޔަކާއި، ރިސޯޓްތަކުގައި މަސައްކަތްކުރައްވާ އެތައް ޒުވާނުންނާއި، އެރަށުގެ އެހެން ބައެއް ޒުވާނުންވެސް ވަނީ ޕީޕީއެމާއި ގުޅިފައެވެ.
ވިލިނގިލިން އެތައް ސަތޭކަ ބަޔަކު ޕީޕީއެމާއި ގުޅުނުް ފޯމުތަކާއި ހަވާލުވެވަޑައިގަތީ ޕްރޮގްރެސިވް ކޮންގްރެސް ކޯލިޝަން ހިންގެވުމާ ހުންނެވި ޢަބްދުއްރަޙީމް ޢަބްދުﷲ އާއި ރިޔާސީ ކެންޑިޑޭޓް ޑރ.މުޙާއްމަދު މުޢިއްޒެވެ.
