މިހާރު މި ހިނގަމުންދާ އިންތިގާލީ މަރުހަލާގައި ދައުލަތުގެ ގިނަ މިނިސްޓްރީތަކާއި ކުންފުނިތަކުން މައުލޫމާތު އެއްކޮށްފައިވާ ކަމަށް އިންތިގާލީ މުއްދަތުގެ ތަރުޖަމާނު މުހައްމަދު ފިރުޒުލް ވިދާޅުވެއްޖެއެވެ.
އިންތިހާބީ ރައީސްގެ އޮފީހުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ފިރްޒުލް ވިދާޅުވީ މިހާތަނަށް އައިިއިރު ވަރަށް ގިނަ އިދާރާތަކާއި މުއައްސަސާތަކަށް ޒިޔާރަތް ކުރެވި، ގާތްގަނޑަކަށް ފުރަތަމަ ބައްދަލުވުންތައް ނިމިފައިވާ ކަމަށެވެ. އޭގެ ތެރެއިން ބައެއް އިދާރާތަކާ އެކީގައި އިތުރު ބައްދަލުވުންތައް ބާއްވަމުންދާ ކަމަށް އޭނާ ވިދާޅުވިއެވެ.
ފިރްޒުލް ވިދާޅުވި ގޮތުގައި ބައްދަލުވުންތަކުން ކަންބޮޑުވާން ޖެހޭ ކަންތައްތަކެއް ދަނީ ފެންނަމުންނެވެ.
އެގޮތުން، އެއްކަމެއްގެ ގޮތުގައި ފިރުޒުލް ވިދާޅުވީ މިނިސްޓްރީއެއްގެ ބަލަދުވެރިކަމުގެ ދަށުގައި ހަމަޖެއްސިފައި ހުންނަ ތަންތަނަކީ އޭގެ ޒާތުގައި އިލްމީ، ފަންނީ މަސައްކަތްތަކެއް ކުރުމަށް ގާނޫނު ތަންދޭ ތަންތަން ކަމަށެވެ. ނަމަވެސް އެ މުއައްސަސާތަކުގެ ތެރެއަށް ސިޔާސީ ނުފޫޒް ވަދެފައިވާތީ، ގާނޫނުން ތަސައްވަރު ކުރެވިފައިވާ ޒިންމާ އަދާ ކުރުމުގައި ދަތިތަކެއް ކުރިމަތިވި ކަން ފާހަގަ ކުރަމުންދާ ކަމަށް ވެސް ފިރުޒުލް ވިދާޅުވިއެވެ.
އިންތިހާބީ ރައީސްގެ އޮފީހުގެ ފަރާތުން 15 ޓްރާންސިޝަނަލް ކޮމިޓީއެއް ވަނީ އެކުލަވާލައިފައެވެ. އޭގެ ތެރެއިން ހަތް ކޮމިޓީއަކުން ސަރުކާރު ކުންފުނިތަކުން މައުލޫމާތު އެއްކުރުމުގެ މަސައްކަތް ކުރާއިރު، 8 ކޮމިޓީއަކުން ސަރުކާރުގެ މިނިސްޓްރީތަކާއި އެކި އެކު ވުޒާރާތަކުން މައުލޫމާތު އެއް ކުރާނެއެވެ.
ޓްރާންސިޝަނަލް ކޮމިޓީތަކަކީ ވެރިކަން ބަދަލުވުމުގެ މަރުހަލާގައި ކަންކަން ވިލަރެސްކުރައްވާ ޑިރެކްޓާ ޖެނެރަލް އޮފް ޓްރާންސިޝަންގެ ދަށުން މަސައްކަތް ކުރާ ކޮމިޓީތަކެކެވެ. އެ ކޮމިޓީތަކުން ކުރާގެ މައިގަނޑު މަސައްކަތަކީ ވެރިކަން ކުރިއަށް ގެންދިއުމަށް ބޭނުންވާ މައުލޫމާތުތައް އެއްކުރުމެވެ.
