ރާއްޖޭގައި މަސައްކަތްކުރާ ބިދޭސީންގެ ޕެންޝަން ފަންޑުން ފައިސާ ދޫކުރާ ގަވާއިދު އިސްލާހްކޮށްފިއެވެ.
މިއީ 2018ވަނަ އަހަރު އެކުލަވާލި ގަވާއިދަށް ގެނެވުނު ފުރަތަމަ އިސްލާހެވެ.
މީގެކުރިން ބިދޭސީ މުވައްޒަފަކު ރާއްޖޭން ދާން ނިންމައިފިނަމަ، ފުރާ ތާރީހުގެ ތިން މަސް ކުރިން ޕެންޝަނަށްއެދޭ ފޯމް އޮފީހަށް ހުށައަޅަން ޖެހޭނެއެވެ، ނަމަވެސް، ގަވާއިދަށް ގެނެވުނު އިސްލާހުތަކާއި ރާއްޖެ ދޫކޮށް ދާން ނިންމާ ހިސާބުން އެ ފޯމު ހުށޭއެޅޭނެއެވެ.
މީގެ އިތުރުން، ޕެންޝަން ފައިސާ ނަގައިފައިވާ ބިދޭސީއަކަށް ވެސް އަލުން އަނބުރާ އެ ބައިވެރި ވެވޭނެ ކަމަށް ވަނީ ކަނޑައަޅާފައެވެ. ނަމަވެސް ދެވަނަ ފަހަރަށް ޖަމާކުރާ ފައިސާ ނެގޭޏީ އުމުރުން 65 އަހަރު ވުމުންނެވެ.
ބިދޭސީ މުވައްޒަފުން ފައިސާ ޖަމާކުރަން ޖެހޭނީ އެ ބިދޭސީ މުވައްޒަފެއްގެ ނަމުގައި ނުވަތަ އެ މުވައްޒަފުން ކަނޑައަޅާ އެހެން މީހެއްގެ ނަމުގައެވެ. ފައިސާ ޖަމާކުރެވޭ އެކައުންޓް ވާން ޖެހޭނީ ރާއްޖޭގެ ބޭންކެއްގައި ހުޅުވާފައި ހުންނަ ދިވެހި ރުފިޔާ އެކައުންޓަކަށެވެ.
ރާއްޖޭގައި މަސައްކަތްކުރަމުން ދަނިކޮށް މަރުވާ ބިދޭސީންގެ ވާރިޘުންނަށް އެ މުވައްޒަފެއްގެ ޕެންޝަން ފައިސާ ހޯދުމަށް އެދެވޭނެ ކަމަށް ވަނީ ބަޔާންކޮށްފަ އެވެ. އަދި ހުށައަޅާ ލިޔެކިޔުންތަށް ކަށަވަރު ކުރުމަށް ފަހު ވާރިޘުންގެ އެކައުންޓަށް ފައިސާ ޖަމާކުރެވޭނެއެވެ.
