ސަހްޔޫނީ އިޒްރޭލުން މިދިޔަ ހޮނިހިރު ދުވަހުން ފެށިގެން ފަލަސްތީނުގެ ރައްޔިތުންނާ ދެކޮޅަށް ހިންގަމުން ޢުދުވާނުގައި މިހާތަނަށް 3،000 އަށްވުރެ ގިނަ ފރައްޔިތުން ޝަހީދު ކޮށްލައފި ކަމަށް ފަލަސްތީނުގެ ސެންޓްރަލް ބިއުރޯ އޮފް ސްޓެޓިސްޓިކްއިން ހާމަ ކުރައްވައިފިއެވެ.
ފަލަސްތީނުގެ ކަމާބެހޭ ފަރާތްތަކުން ހާމަ ކުރައްވާ ގޮތުގައި ޝަހީދުވި މީހުންގެ ތެރެއިން ދެބައިކުޅަ އެއްބަޔަށްވުރެ ގިނައީ ކުޑަ ކުދިންނާއި އަންހެނުންނެވެ. އަދި 10،000 އަށްވުރެ ގިނަ މީހުން ޒަޚަމްވެފައިވާ ކަމަށްވެސް ތަފާސް ހިސާބުތަކުން ދައްކައެވެ.
ހުއްޓުމެއް ނެތި އިޒްރޭލުން ހަފްތާއެއް ވަންދެން ވައިގެ މަގުން ދިން ވަރުގަދަ ހަމަލާތަކުގެ ސަބަބުން ޣައްޒާއިން 64،000 ގެދޮރު ހަލާކުވެފައިވާ ކަމަށާއި މީގެ ތެރެއިން 5،000 ގެދޮރު ބޭނުން ނުކުރެެވޭ ވަރަށް ހަލާކުވެފައިވާ ކަމަށްވެސް ފަލަސްތީނުގެ ސެންޓްރަލް ބިއުރޯ އޮފް ސްޓެޓިސްޓިކްއިން ހާމަކުރައްވައެވެ.
އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ލާއިންސާނީ އަނިޔާތައް ކުރަމުން އަންނައިރު، އަރަބް ލީގާއި އދ. އަށް އެކަން ހުއްޓުވުމަށް ވަނީ ނުކުޅެދިފައެވެ.
އިޒްރޭލުން ޣައްޒާއާ ދެކޮޅަށް، އަދި ޖުމްލަކޮށް ފަލަސްތީނާ ދެކޮޅަށް ހިންގަމުން އަންނަ ޢުދުވާންތަކުގެ މައިގަނޑު ބޭނުމަކީ ފަލަސްތީނު ބިމުން ފަލަސްތީނުގެ މުސްލިމުން ނައްތާލައި، މުސްލިމުންގެ ފުރަތަމަ ޤިބްލަ ކަމުގައިވާ މަސްޖިދުލް އަޤްސާ ޒަޔަނިސްޓް ޔަހޫދީންގެ ބާރުގެ ދަށަށް ގެނައުމެވެ.
