ރާއްޖޭގެ މަޝްހޫރު ވިޔަފާރިވެރިޔާ ގާސިމް އިބްރާހީމް ދިވެހި ރައްޔިތުންނަށް ކީރިތި ގުރުއާނުގެ އޮންލައިންކޮށް ތަފްސީރެއް ހަދިޔާ ކުރައްވައިފިއެވެ.
ސައުދީއަރަބިއްޔާއިން ނެރެފައިވާ އައްތަފްސީރުލް ވާސިހުލް މުޔައްސިރު ދިވެހި ބަހަށް ތަރުޖަމާކޮށް، އެ ތަރުޖަމާގެ ޑެސްކްޓޮޕް ވާޝަން ނެރުނީ މިއަދެވެ.
އެކްސް.ކޮމްގައި ކުރެއްވި ޕޯސްޓެއްގައި ޤާސިމް ވިދާޅުވީ 'ފަސޭހަ ތަފްސީރު’ގެ ނަމުގައި އެކުލަވާލާފައިވާ ހަ ވޮލިޔުމްގެ މި ފޮތް ޗާޕުކޮށްގެން ރާއްޖޭގެ ކޮންމެ ގެއަކަށް ކޮޕީއެއް ހަދިޔާ ކުރަން ނިންމާފައިވާ ކަމަށެވެ.
މި ފޮތުގެ ޑެސްކްޓޮޕް ވާޝަންގެ ސޮފްޓު ލޯންޗިން މިދިޔަ މަހު ބޭއްވާފައިވާއިރު، ރެއިން ފެށިގެން އެ ވާޝަން ވަނީ އާންމުކޮށްފައެވެ.
"ފާއިތުވި ސެޕްޓެމްބަރ މަހުގެ 7 ވަނަ ދުވަހުގެ ރޭ މި ފޮތުގެ ޑެސްކްޓޮޕް ވާ ޝަން ގެ ސޮފްޓްލޯންޗިންވާނީ އިފްތިތާޙް ކުރެވިފައެވެ. އަދި މިއަދު ދިވެހިރާއްޖެ އިސްލާމްވީ ދުވަހުގައި (2 ރަބީޢުލްއާޚިރު 1445 ) މި ފޮތުގެ ވެބްވާޝަން ގެ ފުރިހަމަ ކޮށް މިރެއިން ފެށިގެން ޢާންމު ކުރެވުނީ ތީ الله ތަޢާލާ އަށް ޙަމްދު ކުރަމެވެ. މި މަސައްކަތުގައި އެހީތެރިވެދެއްވި އެންމެހާ ފަރާތްތަކަށް ހިތުގެ ފުން މިނުން ޝުކުރު ދަންނަވަމެވެ." ގާސިމް އެކްސް ޕޯސްޓުގައި ވިދާޅުވެފައިވެއެވެ.
ގާސިމް ވިދާޅުވީ މި މަސައްކަތް ކުރުމުގެ މެދުވެރިއަކަށްވީ ސައޫދީއަރަބިއްޔާގެ ހައްޖާއި އުމްރާއާބެހޭ ވަޒީރުގެ މަގާމުގައި 1999 އިން 2005 އަށް ހުންނެވި އައްސައްޔިދު އިޔާދު ބުން އަމީން މަދަނީ ކަމަށެވެ.
