ފަލަސްތީނުގެ ރައްޔިތުންނަށް އެހީވުމަށް ކޭކް ޑޯނާސް އިން އިއްޔެ ބޭއްވި ފަންޑް ރެއިސިންގ ހަރަކާތުގެ ތެރެއިން 11 ގަޑިއިރުގެ ތެރޭގައި 350،000 އާ ގާތްކުރާ އަދަދަކަށް ރުފިޔާ ހޯދާއިފިއެވެ.
މާލޭގެ ހަތަރު ސަރަހައްދަކާއި ހުޅުމާލޭގެ ތިން ސަރަހައްދެއްގައި ތަފާތު އެކި ބާވަތްތަކުގެ ކެއުންތަކާއި، ޕޭސްޓްރީސް އާއި ބުއިން ވިއްކުމަށް އިއްޔެ ހެނދުނު 7:00 އިން ހަވީރު 6:00 އަށް ސްޓޯލްތައް ބަހައްޓާފައިވެއެވެ.
މީގެ އިތުރުން ހދ. ފިނޭގެ އެ ކޮމިއުނިޓީގެ ވޮލެންޓިއަރުން ހަރަކާތްތެރިވެ، މާލެ ސަރަހައްދުން 341،865 ރުފިޔާ އަދި ފިނޭއިން 5،406 ރުފިޔާއާއެކު ޖުމްލަ 347،271 ރުފިޔާ ލިބިފައިވާކަމަށް ކޭކް ޑޯނާސްގެ ފައުންޑަރ ޢާއިޝަތު ޝެރިން ވިދާޅުވެފައިވެއެވެ.
އަދި މައުލޫމާތު ލިބިފައިވާ ގޮތުގައި މިއާއެކު އެހީގެ ގޮތުގައި 365 ޑޮލަރާއި 55 ޔޫރޯ ލިބިފައިވެއެވެ.
11 ގަޑިއިރު ވަންދެން ކުރިއަށް ގެންދިޔަ މި ހަރަކާތުން ލިބުނު ހުރިހާ ފައިސާއެއް މިހާރު ވަނީ އިންޓަނޭޝަނަލް އެއިޑް ކެންޕޭން (އޭއަސީ) އަށް ހަދިޔާކޮށްފައެވެ.
