ފަލަސްތީނުގެ ނަސްލު ނައްތާލުމަށް އިޒްރޭލުން މިމަހުގެ 7 ވަނަ ދުވަހުން ފެށިގެން ޣައްޒާ އާއި ހުޅަނގު އައްސޭރީގައި ހިންގަމުން އަންނަ ޖަރީމާގައި ފާއިތުވެދިޔަ 24 ގަޑިއިރު ތެރޭގައި 548 މީހުން ޝަހީދު ކޮށްލައިފި ކަމަށް ޣައްޒާގައި ވެރިކަން ކުރަމުން އަންނަ ހަމާސް ޖަމާއަތުން ބުނެފިއެވެ.
އަދި ފާއިތުޗެދިޔަ ސައުވީސް ގަޑިއިރު ތެރޭގައި ޒަޔަނިސްޓް އިޒްރޭލުން ޣައްޒާއަށް ދިން ވައިގެ ހަމަލާތަކީ މިހާތަނަށް ޣައްޒާއަށް ދިން އެންމެ ވަރުގަދަ ވައިގެ ހަމަލާތައް ކަމަށް ޣައްޒާގައި ހަރަކާތްތެރިވާ އަލް ޖަޒީރާގެ ރިޕޯޓަރުން ބުނެއެވެ. ޒަޔަނިސްޓްރ އިޒްރޭލުންގެ ހައްދުފަހަނައެޅި އަސްކަރިއްޔާއިން ނެރެފައިވާ ބަޔާނެއްގައި ބުނީ ފާއިތުވެދިޔަ 12 ގަޑިއިރު ތެރޭގައި ޣައްޒާގެ 328 ތަނަކަށް ވައިގެ މަގުން ހަމަލާ ދީފައިވާނެ ކަމަށެވެ. މިހަމަލާތަކުގައި ފަލަސްތީނުން ފަސް ހާހަށްވުރެ ގިނަ މީހުން މިހާނަށް ޝަހީދުވެފައިވާއިރު މިލިޔަނެއްހައި ރައްޔިތުން ތިބީ ގެދޮރު ގެއްލިފައެވެ.
ފަލަސްތީނުގެ ވަފާ ނިއުސް އެޖެންސީއިން ބުނެފައިވާ ގޮތުގައި ހައްދުފަހަނައެޅި އިޒްރޭލުން ރޭ ދިން ހަމަލާ ތަކުގައި ގިނަބަޔަކު ޝަހީދުވީ ޣައްޒާގެ ދެކުނުގެ ޚާން ޔޫނިސް އާއި ރަފާއިންނެވެ.
އިޒްރޭލުން ހިންގަމުން އަންނަ ގަތުލް އާންމު ހުއްޓުވުމުގައި އދ. އޮތީ ނުކުޅެދިފައެވެ. އަދި ފަލަސްތީނުގެ ވަށައިގެން ތިބި އަރަބި ޤައުމުތަކުގެ މައްޗަށް ބަސް ކިޔަމުންދާތަން ފެންނަނީ އެމެރިކާއިންނެވެ. އިޒްރޭލުގެ ހަމަލާތައް ކުއްވެރިކޮށް ހަމަލާތައް ހުއްޓާލުމަށް ބަޔާނެއް ނެރުން ފިޔަވައި އިތުރު އެއްވެސް ކަމެއް އަރަބި ޤައުމުތަކުގެ ވެރިންގެ ކުރާ މަންޒަރެއް އަދި ނުފެނެއެވެ.
އެމެރިކާގެ ސެކިއުރިޓީ ކައުންސިލްގެ ކޯޑިނޭޓަރ ރޭ ސީއެންއެންއަށް ވިދާޅުވީ މިވަގުތަކީ އިޒްރޭލުން ޣައްޒާއާ ދެކޮޅަށް ދެމުން އަންނަ ހަމަލާތައް ހުއްޓާލަންވީ ވަގުތު ނޫން ކަމަށެވެ. މާނައަކީ އިޒްރޭލުން ޣައްޒާގައި ނަސްލު ނައްތާލުމުގެ ޖަރީމާ ހިންގަމުން މިދަނީ ޑިމޮކްރަސީގެ ނަމުގައި މުޅި ދުނިޔޭގައި ހަންފެތުރުމަށް މަސައްކަތް ކުރަމުން އަންނަ އެމެރިކާގެ ފުރިހަމަ ރުހުމާއި އެހީތެރިކަން ލިބިގެންކަން ދުނިޔެއަށް ހާމަވުމެވެ.
