ފަލަސްތީނަށް އެހީވުމަށް ރާއްޖޭގެ ކޭކް ޑޯނާސް އިން ކުރިއަށް ގެންދިޔަ ފަންޑްރައިސިންގެ ދެ އިވެންޓަކުން ޖަމާކުރި ފަސް ލައްކަ ރުފިޔާ އައިއޭސީއާއި ހަވާލު ކޮށްފިއެވެ.
ކޭކް ޑޯނާސް އިން ވަނީ ފަލަސްތީނު ފަންޑަށް އެހީވުމަށް ދެ ފަހަރެއްގެމަތިން ހަރަކާތްތައް ހިންގާފައިވެއެވެ. މިގޮތުން މިދިޔަގެ 17 ވަނަ ދުވަހުވަނީ މާލޭ ހަތަރު ސަރަހައްދެއްގައާއި ހުޅުމާލޭގެ ތިން ސަރަހައްދެއްގައި ހަރަކާތްތަކެއް ކުރިޔަށް ގެންގޮސްފައެވެ.
މީގެ އިތުރުން އެފަރާތުން މިސަރަހައްދުތަކުގައި ސްޓޯލްތައް ބަހައްޓައިގެން ކެއުމުގެ ބާވަތްތައްވެސް ވިއްކާފައެވެ. އޭގެތެރޭގައި ކޭކާއި، ޕޭސްޓްރީގެ އައިޓެމްތައް ހިމެނެއެވެ. އިވެންޓުގައި މާލެ ސަރަހައްދުން 341،865.25 ރުފިޔާ ހޯދާފައި ވެއެވެ.
އަދި ކޭކް ޑޯނާސް އިން ދެވަނައަށް ބޭއްވި ފަންޑު ރައިސިން އިވެންޓް ކުރިޔަށް ގެންގޮސްފައިވަނީ އާބަންކޯއާއި ގުޅިގެން އޮކްޓޯބަރު 28 އިން 31 ގެ ނިޔަލަށެވެ. މި ހަރަަކާތުން ޖަމާކޮށްފައިވަނީ 242،295.25 ފައިސާ އާއި 162 އެމެރިކާ ޑޮލަރެވެ.
ދެ ހަރަކާތުން ފަލަސްތީނު ފަންޑަށްވަނީ 5 ލައްކައަށްވުރެ ގިނަ ރުފިޔާ ޖަމާކޮށްފައެވެ.
ކޭކް ޑޯނާސް އިން ބުނެފައިވަނީ އިވެންޓުތައް ނިމުމާއެކު ޖަމާކުރެވުނު ފައިސާ، ފަލަސްތީނު ފަންޑަށް ފައިސާ ޖަމާކުރަމުންދާ އިންޓަނޭޝަނަލް އެއިޑް ކެމްޕެއިނާއި ހަވާލު ކޮށްފައިވާ ކަމުގައެވެ.
ކޭކް ޑޯނާސް އިން ގެންދަނީ 2016 ވަނަ އަހަރުން ފެށިގެން އިޖުތިމާއީ މިފަދަ ހަރަކާތްތަކުގައި ބައިވެރި ވަމުންނެވެ.
