ޒަޔަނިސްޓް ޔަހޫދީ ސިފައިން ޣައްޒާއަށް އެއްގަމު މަގުން އަރައިގެން ކުރަމުން އަންނަ ހަނގުރާމައިގައި ރޭ 4 ސިފައިން މަރުވި ކަމަށް އެއްބަސްވެއްޖެއެވެ.
ފަލަސްތީނުގެ ބިންތައް ފޭރިގަނެގެން ތިބި ޒަޔަނިސްޓް އަސްކަރިއްޔާއިން ނެރެފައިވާ ބަޔާނުގައި 4 ސިފައިން މަރުވި ސަރަހައްދު ބުނެފައެއް ނުވެއެވެ. ހަމައެކަނި ބުނެފައި ވަނީ 4 ސިފައިން މަރުވީ ޣައްޒާގައި ކަމަށެވެ.
ރޭ މަރާލި ޒަޔަނިސްޓް 4 ސިފައިންނާއެކު މުޖާހިދުންގެ ހަމަލާތަކުގައި މަރުވި އިޒްރޭލު ސިފައިންގެ އަދަދު 23 އަށް އެރީއެވެ.
ޓެރަރިސްޓް އިޒްރޭލުން ރޭ ބޭއްވި "ވަރ ކެބިނެޓް" ބައްދަލު ވުމަށްފަހު ހައްދު ފަހަނައެޅި ބޮޑުވަޒީރު ނަތަންޔާހޫ ބުނީ ޣައްޒާގެ ތެރޭގައި ކޮންމެ ކުރިމަތިލުމަކީވެސް "ވޭންދެނިވި" ކުރިމަތިލުމެއް ކަމަށެވެ. އަދި އިޒްރޭލުގެ ޓެރަރިސްޓް ދައުލަތަށް މީގެ ކުރިން މިހާ ވަރުގަދަ ރައްދެއް އެއްވެސް ހަނގުރާމައެއްގައި ކުރިމަތި ވެފައި ނުވާ ކަމަށެވެ.
ހަމާސް ޖަމާއަތުގެ އަސްކަރީ ގޮފި. އަލް ޤައްސާމް ބްރިގޭޑުން ނެރެފައިވާ ބައެއް ވީޑިއޯތަކުން ފެންނަ ގޮތުގައި އެޖަމާއަތުން ދަނީ ޑްރޯނުން ނާއި ކޮނޑުމަތީ ބަހައްޓައިގެން ހަމަލާދޭ އާރުޕީޖީ ހަތިޔާރު ބޭނުން ކޮށްގެން ހަމަލާދީ ސަހްޔޫނީ ޓޭންކަރުތަކާއި އެހެނިހެން ވެހިކަލްތަަކަށް ބޮޑެތި ގެއްލުންތަކެއް ދެމުންނެވެ.
ހަމާސް ޖަމާއަތުގެ މުޖާހިދުންނާ ކުރިމަތިލުމުގެ ބަދަލުގައި އިޒްރޭލުގެ ޓެރަރިސްޓް ސިފައިން ވައިގެ މަގުން ހަމަލާ ދެމުން އަންނަނީ އާންމުން ދިރިއުޅޭ އިމާރާތްތަކަށެވެ. ޝަހީދު ކުރަމުން ދަނީ ކުޑަ ކުދިންނާއި އަންހެނުންނާއި އުމުރުން ދުވަސްވީ މީހުންނެވެ.
ފަލަސްތީނާއި މަސްޖިދުލް އަޤްސާގެ މިނިވަންކަމަށްޓަކައި އިޒްރޭލާއި އިޒްރޭލަށް މަދަދުދޭ ހުޅަނގުގެ ބާރުތަކާ ދެކޮޅަށް އަސްކަރީ ގޮތުންނާއި ސިޔާސީ ގޮތުން ހަމާސް ޖަމާއަތުން ހޯދަމުން އަންނަ ކާމިޔާބީތަކީ ތައުރީފް ހައްޤު ކާމިޔާބީތަކެކެވެ.
