އިނގިރޭސި ޕްރިމިއަރ ލީގުގައި ޗެމްޕިއަން މެންޗެސްޓަރ ސިޓީ އާއި ލިވަޕޫލް ބައްދަލު ކުރި މެޗް އެއްވަރުވުމުގެ ފައިދާ ނަގައި އާސެނަލްއިން ތާވަލުގެ ކުރިއަށް ރޭ ޖެހިލައިފިއެވެ.
ސިޓީ އާއި ލިވަޕޫލް ބައްދަލު ކުރި މެޗް ސިޓީގެ އިއްތިހާދު ސްޓޭޑިއަމްގައި ނިމުނީ 1-1 އިން އެއްވަރު ވެގެންނެވެ. މެޗުގައި ފުރަތަމަ ލަނޑު ޖަހައި ލީޑް ނެގީ ސިޓީއިންނެވެ. މިލަނޑު 27 ވަނަ މިނެޓުގައި ކާމިޔާބު ކޮށްދިނީ ފޯވާޑް އާލިންގ ހާލަންޑެވެ. ލިވަޕޫލްއިން އެއްވަރު ކުރީ 80 ވަނަ މިނެޓުގައި އެލެގްޒެންޑަރ އާނޯލްޑެވެ.
މެޗަށްފަހު ސިޓީގެ ކޯޗް ޕެޕް ގާޑިއޯލާ ރެފްރީގެ ނިންމުންތަކާމެދު ހިތްހަމަ ނުޖޭކަން ފާޅުކޮށްފައެވެ. ހާއްސަކޮށް 67 ވަނަ މިނެޓުގައި ޑިފެންޑަރު ރުބެން ޑިއަޒް ޖެހި ލަނޑު، ރެފްރީ ބަލައި ނުގަތް ސަބަބު އެއްގޮތަކަށްވެސް ނޭނގޭ ކަމަށް ގާޑިއޯލާ ބުންޏެވެ.
ސިޓީ އާއި ލިވަޕޫލް މެޗް އެއްވަރުވުމުގެ ފައިދާ ނަގައި އާސެނަލްއިން ތާވަލުގެ ކުރިއަށް ޖެހިލީ ރަށުން ބޭރުގައި 1-0 އިން ބްރެންޓްފޯޑް އަތުން ރޭ މޮޅުވެގެންނެވެ. މެޗުގައި ފެނިގެންދިޔަ ހަމައެކަނި ލަނޑު 89 ވަނަ މިނެޓުގައި ކާމިޔާބު ކޮށްދިނީ ޗެލްސީ ދޫކޮށް މިސީޒަނުގައި އާސެނަލްއާ ގުޅުނު ފޯވާޑް ކައި ހަވާޓްޒެވެ.
މިމޮޅާއެކު އާސެނަލް ތާވަލުގެ އެއްވަނައިގައި އޮތީ 30 ޕޮއިންޓާއެކުވެ. ދެވަނައިގައި ސިޓީ އޮތީ 29 ޕޮއިންޓާއެކުއެވެ. ލިވަޕޫލް ތިންވަނައިގައި އޮތީ އެއްޕޮއިންޓް ފަހަތުންނެވެ.
ޕްރިމިއަރ ލީގުގައި މިރޭ ކުޅުމަށް ހަމަޖެހިފައިވާ ފާހަގަ ކޮށްލެވޭ މެޗުތައް:
ޓޮޓެންހަމް - އެސްޓަންވިލާ (19:00)
އެވަޓަން - މެންޗެސްޓަރ ޔުނައިޓެޑް (21:30)
