އޮކްޓޫބަރު މަހުގެ ހަތްވަނަ ދުވަހުން ފެށިގެން ޣައްޒާއަށް ދެމުންދިޔަ ހަމަލާތައް ފާއިތުވެދިޔަ ހަތްދުވަހު ހުއްޓާލައިގެން ތިބުމަށްފަހު ސަހްޔޫނީ އިޒްރޭލުން މިއަދު އަލުން ހަމަލާތައް ފަށައި ޣައްޒާއިން 70 އަށްވުރެ ގިނަ މީހުން ޝަހީދު ކޮށްލާފައިވާ ކަމަށް ފަލަސްތީނުގެ ސިއްޚަތާ ބެހޭ ވުޒާރާއިން ހާމަ ކުރައްވައިފިއެވެ.
ފަލަސްތީނުގެ ސިއްހަތާއި ބެހޭ ވުޒާރާއިން ހާމަ ކުރައްވާ ގޮތުގައި ޝަހީދުވި މީހުންގެ ތެރޭގައި ގިނައީ އަންހެނުންނާއި ކުޑަ ކުދިންނެވެ. މީގެ ހަތްދުވަސް ކުރިން ހަމަލާތައް ހުއްޓާލުމުގެ ކުރިން އިޒްރޭލުން ވަނީ ޣައްޒާއިން 15،000 އެއްހައި މީހުން ޝަހީދު ކޮށްލާފައެވެ. މީގެ ތިންބައިކުޅަ އެއްބަޔަކީ އަންހެނުންނާއި ކުޑަކުދިންނެވެ.
ސަހްޔޫނީ އިޒްރޭލުން މިއަދު ހެނދުނުން ފެށިގެން ޣައްޒާއަށް ދަނީ ހުއްޓުމެއް ނެތި ބޮން އަޅަމުންނެވެ. ޣައްޒާގެ ރައްޔިތުންނާ ދެކޮޅަށް އިޒްރޭލުން ގަތުލް އާންމު ހިންގަމުން އަންނައިރު ވަށައިގެން ތިބި ޢަރަބި އިސްލާމީ ޤައުމުތަކާއި ދުނިޔޭގެ ސުލްހައަށް އުފައްދާފައިވާ އދ. އޮތީ ދެލޯ މަރައިގެންނެވެ.
ފަލަސްތީނާއި ޣައްޒާގެ ދިފާއުގައި ސަހްޔޫނީންނާއި ދެކޮޅަށް ޖިހާދު ކުރަމުން އަންނަ ހަމާސް ޖަމާއަތުގެ އަސްކަރީ ގޮފި "އަލް ޤައްސާމް ބްރިގޭޑްސް" އިން މިއަދު ބުނީ އެޖަމާއަތުން އިޒްރޭލުގެ އެޝްކޮލޮންއަށް ރޮކެޓުން ހަމަލާދީފައިވާނެ ކަމަށެވެ. އަދި އިޒްރޭލާ ދެކޮޅަށް ކުރަމުން އަންނަ ޖިހާދަށް ނިމުމެއް ނޯންނާނެ ކަމަށް އެޖަމާއަތުން ބުނެއެވެ.
