ގިނަ ބަޔަކު ކުރަމުން ދިޔަ އިންތިޒާރަށް ނިމުމެއް ގެންނަމުން އެންމެފަހުން ވަރުން ކައިވެނިކޮށްފިއެވެ. ވަރުން ކައިވެނި ކޮށްފައި ވަނީ އޭނާގެ ޅައިރުގެ ލޯބިވެރިޔާ ފެޝަން ޑިޒައިނަރ ނަތާޝާ ދަލަލް އާއެވެ.
މިދެތަރިން ކައިވެނީގެ ގޮށް ޖަހާފައިވަނީ އާދީއްތަ ދުވަހުއެވެ. މި ދެމީހުން ކައިވެނި ކުރީ އަލީބައުގް އަވަށުގެ ''ދަ މެންޝަން ހޮޓެލް '' ގައެވެ. ކައިވެނި ކޮށްފައިވަނީ ހިންދޫ ސަގާފަތާއި އެއްގޮތަށެވެ. މި ހަފްލާގައި ބައިވެރިވެފައި ވަނީ ދެ ފަރާތުގެ އާއިލާގެ އިތުރުން ގާތް ރަހުމަތްތެރިން އެކަނި ކަމަށް ވެއެވެ.
ކަރަން ޖޯހަރް، މަނީޝް މަލްހޮތްރާ ،ކުނާލް ކޯލީ ،ފަދަ ބަލީވުޑްގެ މަޝްހޫރު ތަރިން ވަނީ މި ހަފްލާގައި ބައިވެރިފައިއެވެ. މި ހަފްލާގައި އަމަލީ ގޮތުން ބައިވެރި ނުވެވުނު ނަމަވެސް އަނުޝްކާ ޝަރްމާ، ޝާހިދު ކަޕޫރް ،ޕްރީތީ ޒިންޓާ އަދި މިނޫންވެސް އިތުރު ތަރިންވަނީ ސޯޝަލް މީޑީއާ މެދުވެރިކޮށް އެމީހުންގެ ހެޔޮދުއާ އާއި މަރުހަބާގެ މެސެޖްތައް ވަރުން އާއި ނަތާޝާއަށް ރައްދު ކޮށްފައިއެވެ.
ވަރުން އާއި ނަތާޝާ ކައިވެނިކޮށްފައި މިވަނީ އަހަރުތަކެއް ވަންދެން ލޯބީގެ ގޮތުން ގުޅިގެން އުޅުމަށް ފަހުއެވެ. ވަރުން އިންޓަވިއުއެއްގައި ބުނެފައިވާ ގޮތުން އޭނާއާއި ނަތާޝާ އެންމެ ފުރަތަމަ ދިމާވީ ގުރޭޑް ހައެއްގައި އުޅުނު އަހަރު ސްކޫލުން ކަމަށެވެ. އޭގޭފަހުން ގްރޭޑް 12 ނިމެންދެން މިދެމީހުން ތިބީ ގާތް އެކުވެރިން ގޮތުގައި ކަމަށެވެ. ވަރުން ލޯބި ހުށެއެޅުމުން ތިން ހަތަރު ފަހަރު ނަތާޝާ އޭނާ ރިޖެކްޓްކުރިކަމަށް ވެސް ވަރުން ވަނީ ބުނެފއެވެ.
ވަރުން އާއި ނަތާޝާގެ ކައިވެނި ވެގެންގޮސްފައި މި ވަނީ މިއަހަރު ބޮލީވުޑްގެ އެންމެ ބޮޑު އަދި ފުރަތަމަ ކައިވެންޏަށެވެ. މިހާރު ގިނަ ބަޔަކު އިންތިޒާރު ކުރަމުން ދަނީ ރަންބީރް ކަޕޫރާއި އާލިއާ ބަޓްގެ ކައިވެނި ހަފްލާއަށެވެ. މި ދެތަރިން ކައިވެނި ކުރާ ދުވަހެއް އަދި ހާމަކޮށްފައެއްނުވެއެވެ.
