ކޮވިޑް-19އަށް ޕޮޒިޓިވްވާ މީހުންގެ ޢަދަދު އިތުރުވެފައިވާތީ އިޢުލާންކޮށްފައިވާ ކާފިއުގެ ވަގުތުގައި ބޭރުގައި އުޅޭމީހުންނާމެދު ފިޔަވަޅު އަޅާނެކަމުގެ އިންޒާރު ފުލުހުން ދީފިއެވެ.
ރޭގަނޑު12:00 އިން ފެށިގެން ފަތިހު04:00 އާއި ހަމައަށް މިމަހުގެ 27 ވަނަ ދުވަހުން ފެށިގެން ދަނީ ކާފިއު ހިންގަމުންނެވެ.
ފުލުހުން ބުނީ، މާސްކް ނާޅާ ބޭރުގައި އުޅޭ މީހުންނާއި، ކާފިއު ގަޑީގައި ބޭރުގައި އުޅޭ މީހުންނަށް، އިތުރު އިންޒާރަކާ ނުލައި ޖޫރިމަނާ ކުރާނެކަމަށެވެ. ކާފިއު ގަޑީގައި ބޭރުގައި އުޅޭ މީހުން ހުއްޓުވުމަށް ޚާއްޞަ މަސައްކަތްތަކެއް ކުރާކަމަށް ފުލުހުން ވަނީ ބުނެފައެވެ. ފުލުހުން ވަނީ އެޗްޕީއޭގެ ގައިޑްލައިނާއި އުދޫލްތަކާއި އެއްގޮތަށް ޢަމަލުކުރުމަށް ހުރިހާ ފަރާތްތަކަށް އިލްތިމާސްކޮށްފައެވެ.
ހެލްތު ޕްރޮޓެކްޝަން އެޖެންސީން މިމަހުގެ 27 ގައި ނެރެފައިވާ އެންގުމުގައިވަނީ ކޮވިޑް-19 އިން ރައްކާތެރިވުމަށް ޚާއްޞަ ފިޔަވަޅުތަކެއް އަޅާފައިވާ ކަމަށެވެ. އެގޮތުން މާލެއާއި ހުޅުމާލެއާއި، ވިލިމާލޭގައި ޕާޓީތަކާ، ޙަފްލާތަކާއި ރަސްމިއްޔާތުތައް ބޭއްވުން މަނާކަމަށާއި، މިމަހުގެ 27 ވަނަ ދުވަހުގެ ރޭ ދަންވަރު 12 އިން ފެށިގެން ފަތިހު 4 އަކަށް މާލެއާއި، ހުޅުމާލެއާއި، ވިލިމާލޭގައި އެއްގަމު އުޅަނދުފަހަރު ދުއްވުމާއި، މަގުމައްޗާއި އާއްމު ތަންތަނަށް މީހުން ނުކުތުން މަނާކަމަށް އެޗްޕީއޭގެ އެންގުމުގައިވެއެވެ.
