ވަޒީފާގެ މައިދާނުގައި ނުކުޅެދޭ މީހުންނަށް ހަމަހަމަ ފުރުސަތު ހޯދައި ދިނުމުގެ މަގުސަދުގައި، ނުކުޅެދުންތެރިކަން ހުންނަ މީހުންނަށް ވަޒީފާގެ ފުރުސަތު ހޯދައި ދިނުމާއި ވަޒީފާ ދިނުމުގައި އަމަލު ކުރާނެ ގޮތުގެ ގަވާއިދު އެކުލަވާލައިފިއެވެ.
މިނިސްޓްރީ އޮފް ފެމިލީ އެންޑް ސޯޝަލް އެންޑް ޑިވެލޮޕްމަންޓުން އެކުލަވާލި https://gazette.gov.mv/gazette/6944 މިގަވާއިދުގެ މަގުސަދަކީ، ނުކުޅެދުންތެރިކަން ހުންނަ މީހުންނަށް، އެހެން މީހުންނެކޭ އެއްފަދައިން އެމީހަކު އިހުތިޔާރު ކުރާ ވަޒީފާއެއް އަދާ ކުރުމުގައާއި މަސައްކަތް ކުރުމުގަައި، ވަޒީފާގެ މައިދާނުގައި ހަމަހަމަ ފުރުސަތު ހޯދައި ދިނުމެވެ.
ހަމައެހެންމެ، ވަޒީފާދިނުމުގައި މަސައްކަތުގެ މާހައުލުގައި ނުކުޅެދުންތެރިކަން ހުންނަ މީހުންނަށް އެމީހުންގެ ކިބައިގައި ހުރި ނުކުޅެދުންތެރިކަމެއްގެ ސަބަބުން އެއްވެސް ފަރާތަކުން އެމީހުންނާމެދު ތަފާތުކުރުން ގެންގުޅުން މަނާ ކުރުމާއި، ނުކުޅެދުންތެރިކަން ހުންނަ މީހަކަށް ވަޒީފާ ދޭ ފަރާތަކުން، އެފަރާތަށް މަސައްކަތްކުރާނެ އެކަށީގެންވާ މާހައުލެއް ގާއިމު ކޮށްދިނުމާއި، މަސައްކަތުގެ މާހައުލުގައި އެފަރާތްތައް ޝާމިލު ކުރާނެ އުސޫލުތައް ކަނޑައެޅުން ވެސް ހިމަނާފައިވެއެވެ.
މި ގަވާއިދުގައި ބުނާގޮތުން ނުކުޅެދުންތެރިކަން ހުންނަ މީހާއަށް ވަޒީފާދޭ ތަނަކީ އެ ފަރާތަށް ބޭނުންވާ ސަބަބުވެރި ބަދަލުތައް ހަމަޖައްސައިދެވޭ، އެތަނުގެ މުވައްޒަފުންނަކީ ނުކުޅެދުންތެރިކަން ހުންނަ މީހުންނާއެކު މަސައްކަތް ކުރުމަށް ބޭނުންވާ ތަމްރީން ފުރިހަމަ ކޮށްފައިވާ އިދާރާއަކަށް ވާންޖެހެއެވެ.
މީގެ އިތުރުން ގަވާއިދުގައި ވާ ގޮތުން، ނުކުޅެދުންތެރިކަން ހުންނަ ފަރާތަކުން ވަޒީފާއަށް އެދުމުން ނުކުޅެދުންތެރިކަން ހުންނަ މީހުންނާ ގުޅޭ ކަންކަން ވިލަރެސް ކުރުމަށް، މަދުވެގެން 2 (ދޭއް) ޑިސްއެބިލިޓީ ލިޔޭޒަން އޮފިސަރުން ބައިތިއްބަންވާނެއެވެ.
އަދި ނުކުޅެދުންތެރިކަން ހުންނަ މީހުންނަށް ވަޒީފާ ދިނުމުގައި ބޭނުންވާ ފަންނީ ލަފާދޭ ކޮމިޓީއެއްވެސް އެކުލަވާލަން ޖެހެއެެވެ. މި ކޮމިޓީ އެކުލަވާލުމުގެ ބާރު ދީފައި ވަނީ، އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ވަޒީރަށެވެ. އެހެންކަމުން އެ ކޮމިޓީގެ އިދާރީ މަސައްކަތް ވެސް ކުރާނީ އެ ކޮމިޓީންނެވެ.
މި ގަވާއިދަށް ޢަމަލުކުރަން ފަށާނީ އަންނަ މަހުގެ 18 ވަނަ ދުވަހުން ކަމަށް ގަވާއިދުގައި ވެއެވެ.
ނުކުޅެދުންތެރިކަން ހުންނަ މީހުންނަށް ވަޒީފާ ދިނުމުގައި އަމަލު ކުރާނެ ގޮތުގެ ގަވައިދު އެކުލަވާލާފައި ވާއިރު އެފަދަ ފަރާތްތަކަށް ފަހިވާނެ ގޮތަށް، ޕްލޭނިންގ އަދި ކޮންސްޓަރަކްޝަންއާ ގުޅޭ ގަވާއިދަށް ގެންނަންޖެހޭ ބައެއް ބަދަލުތައް ވީހާވެސް އަވަހަށް ގެނައުމަށް ސަރުކާރުން ވަނީ ނިންމާފައެވެ.
