މެޑިކަލް އިވެކުއޭޝަންގައި ނުވަތަ އަވަސް ފަރުވާއަށް މީހަކު އުފުލަން ޖެހިއްޖެ ހާލަތުގައި ރައީސުލްޖުމްހޫރިއްޔާއަށް އަންގައިގެން ހުއްދައަށް އެދުމެއް ނޯންނަކަމަށް ޑިފެންސް މިނިސްޓަރު މުޙައްމަދު ޣައްސާން މައުމޫން ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ގއ. ވިލިނގިލީގައި ހުންނަ އަތޮޅު ހޮސްޕިޓަލުގައި ވެންޓިލޭޓަރުގައި ފަރުވާ ދިނުމަށްފަހު، އިމަޖެންސީކޮށް އެއަރ އެންބިއުލާންސްގައި މާލެ ގެނައި ކުއްޖާ ނިޔާވެފައިވަނީ ގައުމީ އެެއަރލައިން މޯލްޑިވިއަނުން ގެންނަން މަސައްކަތް ކުރުމުން ކަމަށް ބައެއް ފަރާތްތަކުން ބުނަމުންދާތީ އެކަމާ ގުޅިގެންނެވެ.
މިނިސްޓަރ ވިދާޅުވީ އެފަދަ ހާލަތުގައި އެއީ އެކަމާ ގުޅޭ އިދާރާތަކުން ކޯޑިނޭޓު ކުރެވިގެން ހިންގާކަމެއްކަމަށެވެ. އަދި އެފަދަ ހާލަތެއްގައި ރައީސަށް ގުޅައިގެން ހުއްދަހޯދުމެއް ނޯންނަކަމަށެވެ. ހަމައެހެންމެ 2021 ވަނަ އަހަރުން ފެށިގެން ވެސް މެޑިކަލް އިވެކުއޭޝަންގެ 93 އިން ސައްތަ ކޮށްފައި ވަނީ މޯލްޑިވިއަން މެދުވެރިކޮށް ކަމަށް ސްޓެޓްސްތަކުން ދައްކާ ކަަމަށްވެސް މިނިސްޓަރ ޣައްސާން ވަނީ ވިދާޅުވެފައެވެ.
"2021 އިން ފެށިގެން ސްޓެޓްސްއަށް ބަލާއިރު މެޑިކަލް އިވެކުއޭޝަންގެ %93 ކޮށްފައިނވަނީ މޯލްޑިވިއަން މެދުވެރިކޮށް،" މިނިސްޓަރ ޣައްސާން ވިދާޅުވިއެވެ.
ގއ. ވިލިގިލީގައި ހުންނަ އަތޮޅު ހޮސްޕިޓަލުން ދެމުންއަންނަ ހިދުމަތް ދިނުން ލަސްކަމަށް ބުނެ، އެރަށުގެ ރައްޔިތުން ނުކުމެ، މުޒާހިރާކޮށް، ގއ. އަތޮޅު ހޮސްޕިޓަލުގެ ނަން ބޯޑުގެ މަތީގައި ކަރުދާހުން އާ ނަން ބޯޑެއްވެސް މިމަހުގެ 18 ވަނަ ދުވަހު ހަރުކޮށްފައި ވެއެވެ.
ވިލިނގިލީ އަތޮޅު ހޮސްޕިޓަލްގައި މިމަހު 17 ވަނަ ދުވަހުގެ ރޭ ވެންޓިލޭޓަރަށް ލީ ކުއްޖާ މާލެ ގެނެވިފައިވަނީ ގާތްގަޑަކަށް 16 ވަރަކަށް ގަޑިއިރު ފަހުން، މިމަހުގެ 18 ވަނަ ދުވަހުގެ އިރުއޮއްސެން އުޅެނިކޮށެވެ. މައުލޫމާތު ލިބުނު ގޮތުގައި އެކުއްޖާ ފުރުވާލެވުނީ ވަރަށް ހަވީރުގެ ވަގުތެއްގައި ކަމުގައެވެ.
ނިޔާވި ކުއްޖާއަކީ ވިލިގިލި ސްކޫލްގައި ގްރޭޑް 7 ގައި ތައުލީމު ހާސިލްކުރަމުންދިޔަ ކުއްޖެކެވެ.
