ވިލިމާލޭގައި 500 ހައުސިން ޔުނިޓް ގާއިމު ކުރުމުގެ އަމަލީ މަސައްކަތް އަންނަ އޭޕްރީލް މަހުގެ ތެރޭގައި ފަށްޓަވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރޭ މާލޭގެ އައު މޭޔަރު އާދަމް އާޒިމާއި މާލެ ސިޓީ ކައުންސިލްގެ ތިން ކައުންސިލަރުން ހުވާ ކުރުމަށް ދަރުބާރުގޭގައި ބޭއްވި ރަސްމިއްޔާތުގައެވެ.
މީގެއިތުރުން ރައީސް ވިދާޅުވީ ވިލިމާލެ އަށް ދިމާވެފައިވާ އެންމެ ބޮޑު މައްސަލައަކީ ބޯހިޔާވަހިކަމުގެ މައްސަލަ ކަމަށެވެ. އަދި އެ މައްސަލަ އަށް ހައްލު ހޯދައި ދިނުމަށް އެމަނިކުފާނު މީގެކުރިން މާލެ ސިޓީގެ މޭޔަރަކަށް ހުންނެވި އިރުގައި އުޅުއްވި ނަމަވެސް ސަރުކާރުގެ އެއްބާރުލުން އެކަމުގައި ނުލިބުނު ކަމަށްވެސް ރައީސް ވިދާޅުވިއެވެ.
މި ސަރުކާރުން އެ މަސައްކަތް ފެށްޓެވުމަށް ހަމަޖައްސާފައިވާ ކަމަށާއި އަމާޒަކީ ފަސް އަހަރުގެ ތެރޭގައި އެ މަސައްކަތް ނިންމުން ކަމަށްވެސް އެމަނިކުފާނު ވަނީ ވިދާޅުވެފައެވެ.
