ލިޔުނީ: އަޒްހީން
އއ. ތޮއްޑޫ މަގު ހެދުމުގެ މަޝްރޫޢުގެ އަމަލީ މަސައްކަތް މިއަދު ހަވީރު ފަށައިފިއެވެ.
މިއަދު ހަވީރު ތޮއްޑޫގައި ބޭއްވުނު ރަސްމިއްޔާތެއްގައި މި މަޝްރޫޢު ފައްޓަވައިދެއްވީ ދިވެހި ބަހާއި ސަގާފަތާއި ތަރިކައާއި ބެހޭ ވަޒީރު އަދި ތޮއްޑޫ އެބޭފުޅަކަށްޓަކައި ފަޚްރުވެރިވާ އާދަމް ނަސީރު އިބްރާހީމެވެ.
މި ރަސްމިއްޔާތުގައި ރޯޑް ޑެވެލޮޕްމަންޓް ކޯޕަރޭޝަން (އާރްޑީސީ) ގެ މެނޭޖިންގ ޑިރެކްޓަރ ބްރިގޭޑިއަރ ޖެނެރަލް (ރޓ) އަލީ ޒުހައިރު އާއި ކުންފުނީގެ އިސް ބޭފުޅުންގެ އިތުރުން ކައުންސިލް މެންބަރުން ބައިވެރިވެވަޑައިގެންފައިވެއެވެ.
ތޮއްޑޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މަޝްރޫޢުގައި ސޮއި ކުރީ 2023 ވަނަ އަހަރުގެ ސެޕްޓެމްބަރު މަހުގެ 5 ވަނަ ދުވަހުއެވެ. މި މަޝްރޫޢުގެ ޖުމްލަ އަގަކީ 77,426,106.17 ދިވެހި ރުފިޔާ އަދި މި މަޝްރޫޢުގެ ދަށުން ޖުމްލަ 2.84 ކިލޯމީޓަރު ހިމެނޭހެން 5 މަގެއްގެ މަސައްކަތް ކުރެވިގެންދާނެކަމަށް އާރްޑީސީއިން ބުނެއެވެ.
އއ. ތޮއްޑޫގެ މަގުތައް ތަރައްޤީ ކުރުމުގެ ތެރޭގައި ސްޓޯރމް ވޯޓަރ ނެޓްވޯކާއި ފެން ހިއްކުމަށް ގަޓަރުތައް ހެދުމާއި ފެނާއި ނަރުދަމާ ހިމެނޭހެން ޔުޓިލިޓީ ލައިންތަކަށް ބޭނުންވާ ޖަންކްޝަންތައް ބެހެއްޓުމާއި މަގު ބައްތި ޖެހުމާއި ސްޕީޑް ބްރޭކަރާއި ރޯޑް ސައިން ބޯޑު ހަރުކުރުން ފަދަ މަސައްކަތް ހިމެނިގެންދާނެކަމަށް އާރްޑީސީއިން ބުނެއެވެ.
ތޮއްޑޫ މަގުތައް ތަރައްޤީ ކުރަން ނިންމާފައިވަނީ ތާރުގެ ބަދަލުގައި ގައު އަތުރައިގެންނެވެ. ތޮއްޑޫގައި ޤާއިމް ކުރެވޭ އާރްޑީސީގެ ސައިޓާއި އަދި މަގު ހެދުމުގެ މަޝްރޫޢަށް ބޭނުންވާ ސާމާނު އިތުރުން ވެހިކަލްތައް މިހާރުވަނީ އެރަށް ފޮނުވިފައިކަމަށްވެސް އެ ކުންފުނިން ބުނެއެވެ.
ރާއްޖޭގައި އެންމެ ފުޅާ ދާއިރާއެއްގައި ދަނޑުވެރިކަން ކުރަމުން އަންނަ އަދި މިހާރު ލޯކަލް ޓުރިޒަމްގައި ފާހަގަ ކޮށްލެވޭ ތޮއްޑޫގެ މަގުތަކީ އަޑިގުޑަން ގިނަ ދުއްވާ އުޅަނދުފަހަރަށާއި ހިނގާ މީހުންނަށް ދަތި އުނދަގޫ މަގުތަކެއްކަން ފާހަގަ ކޮށްލެވެއެވެ.
