ޕީއެސްޖީއަކީ ޗެމްޕިއަންސް ލީގު ހާސިލުކުރުމަށް ބިނާކުރެވިފައިވާ ޓީމެއް ކަމަށް ޑޯޓްމަންޑުގެ ކޯޗު އެޑިން ޓާޒިޗް ބުނެފިއެވެ.
ޓާޒިޗް މިހެން ބުނީ މާދަމާ ރޭ ޕީއެސްޖީ އާއި ޑޯޓްމަންޑް ކުރިމަތިލާ, ޗެމްޕިއަންސް ލީގުގެ ސެމީ ފައިނަލުގެ ކުރިން ވާހަކަދައްކަމުންނެވެ.
ޓާޒިޗް ބުނި ގޮތުގައި 2011 ވަނަ އަހަރު ގަތަރު ސްޕޯޓްސް އިންވެސްޓްމެންޓް ގްރޫޕުން ޕީއެސްޖީއާ ހަވާލުވި ހިސާބުން ފެށިގެން އެ ކްލަބުގެ މައިގަނޑު މަގްސަދަކަށް ވެފައިވަނީ ޗެމްޕިއަންސް ލީގު ކާމިޔާބު ކުރުން ކަމަށެވެ.
"މިހާރުގެ ވެރިން ޕީއެސްޖީގައި ކުރިއަށް ގެންދާ ޕްރޮޖެކްޓްގެ ލަނޑުދަނޑިއަކީ ޗެމްޕިއަންސް ލީގު ހާސިލުކުުރުން. ދިހަ އަހަރަށްވުރެ ގިނަ އަހަރު ފާއިތުވެއްޖެ އެ ލަނޑުދަނޑިއަށް އެ ކްލަބުން މަސައްކަތް ކުރަމުން އަންނަތާ" ކުރިއަށް އޮތް ސެމީ ފައިނަލާ ބެހޭ ގޮތުން ވާހަކަދައްކަމުން ޓާޒިޗް ބުންޏެވެ.
ޑޯޓްމަންޑުން ވަނީ މި ސީޒަނުގެ ޗެމްޕިއަންސް ލީގުގެ ގްރޫޕް ސްޓޭޖުގައި ޕީއެސްޖީއާ ދެ ފަހަރަށް ކުރިމަތި ލައިފައެވެ. އެ ދެ މެޗުން ޑޯޓްމަންޑަށް ހޯދުނީ އެންމެ ޕޮއިންޓެއް ކަމުގައިވިއަސް, އެ ޓީމުން ގްރޫޕް ސްޓޭޖު ނިންމާލީ ފަހުރުވެރި އެއްވަނައިގައެވެ.
ޑޯޓްމަންޑާއި ޕީއެސްޖީ ވާދަކުރާ ސެމީ ފައިނަލު އޮންނަނީ 2 މެއި ވާ ބުރާސްފަތި ދުވަހުގެ 00:00 ގައެވެ. މި މެޗު ކުޅެވިގެންދާނީ ޑޯޓްމަންޑުގެ ދަނޑު ކަމުގައިވާ ސިގްނަލް އިޑޫނާ ޕާކްގައެވެ.
