ކުވައިތުގެ ޤާނޫނު ހަދާ މަޖިލިސް، އެ ޤައުމުގެ އަމީރު އިއްޔެ ސަސްޕެންޑު ކުރައްވައިފިއެވެ. އެއާ އެކު ބައެއް ޤާނޫނުތަކަށް ޢަމަލު ނު ކުރުމަށް ވެސް ނިންމަވާފައި ވެއެވެ. އަދި ބައެއް ބާރުތައް އެ މަނިކުފާނުގެ ބާރުގެ ދަށަށް ގެންދަވައިފިކަމަށް މީޑިއާގެ ޚާބަރުތައް ބުނެއެވެ. އެ ޤައުމުގެ ޤައުމީ ޓީވީ އިން ދުރަށް ފޮނުވި ބަޔާނެއްގައި ވިދާޅުވީ 50 މެމްބަރުންގެ މައްޗަށް އެކުލެވޭ ޤާނޫނު ހަދާ މަޖިލިސް ވަގުތީ ގޮތުން ސަސްޕެންޑު ކުރެވިފައިވާ ކަމަށާއި، މި ސަސްޕެންޝަން 4 އަހަރަށްވުރެ އިތުރު ނުވާނޭ ކަމުގައެވެ.
އަމީރު މިޝްޢަލް އަލް އަޙްމަދު އައްޞަބާޙް ވިދާޅުވީ އެ ޤައުމުގައި ކޮރަޕްޝަން އިތުރުވެފއިވާ ކަމަށާއި، ޤައުމުގެ ޙާލަތު އެހާ ރަނގަޅު ނޫންކަމަށެވެ. "ކުރިމަތިވަމުންދާ އުނދަގުލާއި، ނުރައްކަލާ ކުރިމަތި ލުމަށް ވަނީ ދަތިވެފައި" އަމީރު ވިދާޅުވިއެވެ. މި ދިޔަ އަހަރުގެ ޑިސެމްބަރ މަހު ވެރިކަމާ ޙަވާލުވެ ވަޑައިގެން ނިމި ދިޔަ އޭޕްރީލްގައި ޤާނޫނު ހަދާ މަޖިލިސްގެ އިންތިޚާބު ބޭއްވުމަށް ރާވާފައި އޮތް ނަމަވެސް އެ އިންތިޚާބު ބާއްވާފައި ނުވެއވެ.
މި މައްސަލަ ކުރިމަތި ވެފައި މި ވަނީ، އަމީރު މިޝްޢަލްގެ ވަޒީރުންގެ މަޖިލީހާއި، ޤާނޫނު ހަދާ މަޖިލިހާ ދެމެދު ބައެއް ކަންކަމުގައި އެއްބަސް ނުވެވިގެން ކަމުގައި އަލްޖަޒީރާއިން ރިޕޯޓުކޮށްފައި ވެއެވެ.
