އޮސްޓްރޭލިއާ އާއި އެމެރިކާއިން ވަނީ ޕެސިފިކް ސަރަހައްދުގެ ކަނޑުގެ ދިފާއީ ނިޒާމަށް އިންގިލާބީ ބަދަލުތަކެއް ގެންނާނެ ކަމަށް ވައުދުވެފައިވާ އެޑްވާންސް އަންޑަސީ ޑްރޯން، "ގޯސްޓް ޝާކް" އަދި "މަންޓާ ރޭ" ތައާރަފްކޮށްފައެވެ.
އަންކްރޫޑް އަންޑަވޯޓާ ވެހިކަލްސް (ޔޫޔޫވީ) ރަމްޒުކޮށްދެނީ ކަނޑުއަޑީގެ ހަނގުރާމައިގެ ޓެކްނޮލޮޖީއަށް ލިބިފައިވާ ބޮޑެތި ކުރިއެރުންތަކެވެ. މި ޑްރޯންތައް ހަނގުރާމައިގައި އިންސާނުންގެ ފުރާނައަށް ހުރި ނުރައްކާތައް ކުޑަކޮށް، އިންޓެލިޖެންސް، ސަވައިލެންސް، ރިކޮނިސެންސް އަދި ސްޓްރައިކް ކެޕޭސިޓީ އިތުރުކުރުކުރާނެކަމަށް އެމެރިކާއިން ބެނެއެވެ.
އަންދުރިލް އޮސްޓްރޭލިއާއިން އުފެއްދި ގޯސްޓް ޝާކް އަކީ އޮސްޓްރޭލިއާގެ ދިފާއީ ވުޒާރާއިން "ދުނިޔޭގެ އެންމެ ޒަމާނީ ކަނޑުއަޑީގެ އޮޓޮނޮމަސް ވެހިކަލް" ގެ ގޮތުގައި އިފްތިތާހުކުރި އުޅަނދެކެވެ. މި ސްޓެލްތީ، ލޯންގް ރޭންޖް ޔޫޔޫވީ އަންނަ އަހަރު ނިމުމުގެ ކުރިން އޮސްޓްރޭލިއާގެ ފްލީޓާ ގުޅިދާނެ ކަމަށް ބެލެވިފައިވީ ނަމަވެސް، ތަފްސީލުތައް އަދިވެސް ވަނީ ގިންތިކޮށްފައެވެ. އޮސްޓްރޭލިއާގެ ޗީފް ޑިފެންސް ސައިންޓިސްޓް ތާނިޔާ މޮންރޯ ވިދާޅުވި ގޮތުގައި ޝެޑިއުލްގެ ކުރިން ފުރަތަމަ ގޯސްޓް ޝާކް ޕްރޮޓޮޓައިޕް ޑެލިވަރީ ކުރުމަކީ ބޭނުންވާ ސްޕީޑުގައި ކެޕޭސިޓީ ޑިވެލޮޕްކުރުމަށް އާ މިންގަނޑެއް ކަނޑައެޅޭ ކަމެކެވެ.
ހަމައެފަދައިން ބޮއިންގ އިން އުފެއްދި މޮޑިއުލަރ، އޮޓޮނޮމަސް ސަބްމަރސިބަލް އެއް ކަމަށްވާ އޯރކާ ޔޫޔޫވީއާއެކު ވެސް އެމެރިކާއިން ދަނީ ކުރިއަރަމުންނެވެ. އޯރްކާ ތަރައްގީ ކުރަމުން އަންނަތާ ދިހަ ވަރަކަށް އަހަރު ވެފައިވާއިރު، ދާދި ފަހުން ޓެސްޓް ޕްލެޓްފޯމެއް ނިންމުމުން އެ ޔޫޔޫވީގެ ގާބިލްކަން ހާމަކުރިކަމަށްވެއެވެ. ޕެންޓަގަން އިން އިތުރު ފަސް އޯކާ ހޯދުމުގެ ވިސްނުން ގެންގުޅޭކަމަށްވެސް ހާމަކޮއްފަވެއެވެ.
އެމެރިކާގެ އެހެން އެންޓްރީއެއް ކަމަށްވާ ނޯތުރޮޕް ގްރޫމަންގެ މަންޓާ ރޭގައި މޮޑިއުލަރިޓީ އާއި އެފިޝަންސީ އަށް ބާރު އަޅާފައިވެއެވެ. ކެލިފޯނިއާގެ އައްސޭރިފަށުން މި އަހަރުގެ ކުރީކޮޅު ޓެސްޓުކުރި މަންޓާ ރޭ ސްޓޭންޑަޑް ޝިޕިން ކޮންޓެއިނަރުތަކުގައި އުފުލައި، މިޝަންތަކަށް ބޭނުންވާ ހަކަތަ ރައްކާކޮށް، ފީލްޑުގައި އެސެމްބްލް ކުރެވޭނެއެވެ. މި ޕްރޮޖެކްޓް ބަލަހައްޓަމުން އަންނަ ޑިފެންސް އެޑްވާންސްޑް ރިސާޗް ޕްރޮޖެކްޓްސް އެޖެންސީ( ޑާޕާއިން) ދަނީ އެމެރިކާގެ ނޭވީއާ ގުޅިގެން އިތުރަށް ޓެސްޓުކުރުމާއި ޑިޕްލޮއިމަންޓް ހެދުމުގެ މަސައްކަތް ކުރަމުންނެވެ.
ޗައިނާއިން ވެސް ޔޫޔޫވީ ޓެކްނޮލޮޖީއަށް ކުރިއެރުންތަކެއް ހޯދަމުން އަންނައިރު، ބޮޑެތި ޔޫޔޫވީތަކެއް ތަރައްގީ ކުރަމުންދާ ކަމަށް ރިޕޯޓުތަކުން ދައްކައެވެ. ކެނެޑާ، ފަރަންސޭސިވިލާތް، އިންޑިއާ، އީރާން، އިޒްރޭލް، އުތުރު ކޮރެއާ، ނޯވޭ، ރަޝިއާ، ދެކުނު ކޮރެއާ، ޔޫކްރެއިން އަދި އިނގިރޭސިވިލާތް ފަދަ އެހެން ގައުމުތަކުން ވެސް މިފަދަ ޓެކްނޮލޮޖީތަކަށް އިންވެސްޓްކުރަމުން އަންނައިރު، ދުނިޔޭގެ ކަނޑުގެ އަސްކަރީ ސްޓްރެޓެޖީގައި ކަނޑުއަޑީގެ ޑްރޯންގެ މުހިންމުކަން އިތުރުވަމުންދާކަން ފާހަގަކުރެވެއެވެ.
