ސައުދީ ފަންޑް ފޯ ޑިވެލޮޕްމަންޓް (އެސްއެފްޑީ) ގެ ޗީފް އެގްޒެކެޓިވް އޮފިސަރ ސުލްތާން ބިން އަބްދުއްރަހްމާން އަލް މަރްޝަދް, ރައީސުލްޖުމަހޫރިއްޔާ ޑރ.މުހައްމަދު މުއިއްޒުގެ އަރިހަށް އިހުތިރާމުގެ ދަތުރުފުޅެއްގައި ރާއްޖެ ވަޑައިގަންފިއެވެ.
މިއަދު މެންދުރު ފަހު ރައީސުލްޖުމްހޫރިއްޔާގެ އޮފީހުގައި ދެ ބޭފުޅުން ކުރެއްވި ބައްދަލުވުމުގައި ވަނީ އެކިއެކި މަޝްރޫއުތަކާ ބެހޭ ގޮތުން މަޝްވަރާ ކުރައްވާފައެވެ. އޭގެ އިތުރުން މި ބައްދަލުވުމުގައި ދެ ގައުމުގެ މެދުގައި އޮންނަ ގުޅުން އިތުރަށް ވަރުގަދަކުރުމާ ބެހޭ ގޮތުން ވެސް ވަނީ ވާހަކަފުޅު ދައްކަވާފައެވެ.
އެސްއެފްޑީގެ ސީއީއޯއާއެކު މިއަދު ބޭއްވި ބައްދަލުވުމުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ ރާއްޖޭގެ ތަރައްގީ އިތުރު ހަރުފަތްތަކަކަށް ވާސިލުކޮށްދިނުމަށް ޓަކައި އެސްއެފްޑީގެ ފަރާތުން ދެއްވަމުންގެންދާ ދީލަތި އެހީއަށް ޝުކުރު އަދާކޮށްފައެވެ. އަދި ދާދި ފަހުން ރައީސް އުމްރާ އަޅުކަން އަދާ ކުރެއްވުމަށް ޓަކައި ސައުދީ އަރަބިއާއަށް ކުރެއްވި ދަތުރުފުޅުގައި އެ މަނިކުފާނަށް އެ ގައުމުން ދެއްވި ފުރިހަމަ މެހެމާންދާރީއަށް ވަނީ ޝުކުރު އަދާކޮށްފައެވެ.
މި ބައްދަލުވުމުގައި ވާހަކަފުޅު ދައްކަމުން އެސްއެފްޑީގެ ސީއީއޯ ވަނީ ދިވެހިރާއްޖެއަށް އެ މަނިކުފާނުގެ ފުރިހަމަ އެއްބާރުލުން ލިބޭނެ ކަމުގެ ޔަގީންކަން ރައީސުލްޖުމްހޫރިއްޔާއަށް ދެއްވާފައެވެ. އޭގެ އިތުރުން އެ މަނިކުފާނު ވަނީ ރާއްޖޭގެ ފަރާތުން ލިބުނު މެހެމާންދާރީ ފާހަގަކޮށް, ރާއްޖެ އާއި ސައުދީއާ ދެމެދު އޮންނަ ގުޅުން އިތުރަށް ވަރުގަދަ ކުރަން ގަސްދުކުރައިވާ ކަން ހާމަކުރައްވާފައެވެ.
