ޓައިސަން ފިއުރީ ބަލިކޮށް ބޮކްސިންގެ ހެވީވެއިޓް ޗެމްޕިއަންކަން އޮލެކްސަންޑަރ އުސައިކް ކާމިޔާބު ކޮށްފިއެވެ.
ހެވީވެއިޓް ޗެމްޕިއަންކަން އުސައިކް ހާސިލުކުރީ 115-112, 113,114, 114,113 އިން ފިއުރީ ބަލިކޮށްގެންނެވެ.
ސައުދީ އަރަބިއާގެ ކިންގްޑޮމް އެރީނާގައި ކުރިއަށްދިޔަ ބޮކްސިން މެޗުގައި އުސައިކް އާއި ފިއުރީގެ ފަރާތުން ފެނިގެންދިޔައީ ވަރަށް ވާދަވެރި މެޗެކެވެ. މެޗުގެ ފުރަތަމަ ކޮޅުގައި ފިއުރީގެ ފަރާތުން ވަރުގަދަ ތެޅުމެއް ފެނިގެންދިޔަ ކަމުގައިވިއަސް މެޗުގެ ނުވަވަނަ ރައުންޑްގައި އުސައިކް ވަނީ މެޗުގެ އޮއިވަރު ބަދަލުކޮށްލާފައެވެ. ނުވަވަނަ ރައުންޑްގެ ފަހުން އުސައިކްގެ ފަރާތުން ފެނިގެންދިޔަ ވަރުގަދަ ކުޅުމުގެ ސަބަބުން އޭނާއަށް ވަނީ ފަނޑިޔާރުންގެ ނިންމުމުން މެޗު ކާމިޔާބު ކުރެވިފައެވެ.
މެޗަށްފަހު ވާހަކަދައްކަމުން ފިއުރީ ބުނީ އޭނާ ގަބޫލު ކުރާ ގޮތުގައި މެޗުން މޮޅުވީ އޭނާ ކަމުގައެވެ.
"އުސައިކް މޮޅުވި ބައެއް ރައުންޑުތަކުގަ. އެކަމަކު އަހަންނަށް ފެންނަ ގޮތުގައި އޭނާއަށްވުރެ ގިނަ ރައުންޑުތަކުން އަހަރެން މޮޅުވި. ދެން އެހެން ކިޔައިގެން ހުންނާކަށް ބޭނުމެއް ނޫން. އަހަރެން ބޭނުން އޮކްޓޯބަރުގަ ރީމެޗް ކުރަން" މެޗަށް ފަހު ވާހަކަދައްކަމުން ފިއުރީ ބުންޏެވެ.
ފިއުރީ ބަލިކޮށް ހެވީވެއިޓްގެ ޗެމްޕިއަންކަން ހާސިލުކުރުމާއެކު, ޔޫކްރެއިނަށް އުފަން އުސައިކް ވަނީ 25 އަހަރަށް ފަހު އެ ޑިވިޝަނުގެ ޗެމްޕިއަންކަން ހާސިލުކުރި ބޮކްސާއަށް ވެފައެވެ. އެންމެ ފަހުން ބޮކްސިންގެ ހެވީވެއިޓު ޑިވިޝަނުގެ ޗެމްޕިއަންކަން ހާސިލުކޮށްފައިވަނީ 1999 ވަނަ އަހަރު ލެނޮކްސް ލުވިސްއެވެ.
